Украина АҚШ-тың Иранға жасаған соққысын қолдады

Киев АҚШ күштерінің Ирандағы ядролық бағдарламаға қатысы бар нысандарға жасаған соққысын қолдайтынын мәлімдеді.

Украина Сыртқы істер министрлігі таратқан мәлімдемеде қазіргі жағдайға Иран режимінің деструктивті саясаты себеп болғаны атап өтілген. Киев Иранның ядролық бағдарламасын жоюды жақтайды, себебі бұл бағдарлама өзге мемлекеттерге қауіп төндіруі мүмкін.

Ведомствоның мәліметінше, Иранның ядролық бағдарламасына қатысты мәселені шешуге бағытталған халықаралық күш-жігер ұзақ жылдар бойы нәтиже бермей келген. Сонымен қатар АҚШ билігі Иранға келіссөздерден бас тартудың салдары туралы ескерту жасаған болатын. Министрлік АҚШ пен Израильдің бірлескен әрекеті Иран режиміне аймақтағы жағдайды одан әрі ушықтыруға жол берілмейтінін көрсеткен нақты сигнал екенін атап өтті.

Украина өз еркімен ядролық арсеналдан бас тартқан мемлекет ретінде Иранның ядролық бағдарламасын тоқтату қажеттігі жөнінде пікір айтуға моральдық құқығы бар екенін мәлімдеді.

Сонымен қатар Украина СІМ Иранның Ресейге әскери қолдау көрсетіп отырғанына да тоқталып, бұл әрекеттерді Украинаға қарсы агрессияға қосылғандық деп бағалады. Киев Тегераннан Ресейге қолдау көрсетуді тоқтатуды тағы да талап етті.

Украина тарапы иран халқының еркін әрі бақытты өмір сүруге лайық екенін, қазіргі режим жағдайында ондай мүмкіндік жоқ екенін атап өтті.