ҰҚК жанындағы Сыбайлас жемқорлыққа қарсы қызмет немен айналысады?

Президент Қасым-Жомарт Тоқаев 14 шілде күні Ұлттық қауіпсіздік комитетінің жұмысын жетілдіруге қатысты жарлыққа қол қойды. Бұл құжат аясында ҰҚК жанындағы Сыбайлас жемқорлыққа қарсы қызметтің қызметі ресми түрде бекітілді. Бұл туралы Kazinform агенттігі хабарлады.

Жаңа қызметтің құзыретіне сыбайлас жемқорлық құқықбұзушылықтарын анықтау, жолын кесу, ашу және тергеу кіреді. Оның негізгі міндеттері мыналар:

– сыбайлас жемқорлыққа қарсы саясатты қалыптастыру мен іске асыруға қатысу;

– жедел-іздестіру және қарсы барлау шараларын жүзеге асыру;

– коррупция фактісі туралы ақпарат берген адамдарды қорғау;

– сот шешімімен тәркіленген мүлікті есепке алып, іске жарату;

– мемлекеттік органдармен және шетелдік серіктестермен халықаралық келісімдер аясында бірлесе жұмыс істеу.

Бұған қоса, жаңа ведомство құқықбұзушылықтар жөнінде азаматтардан өтініш қабылдайды, заңнаманы жетілдіру бойынша ұсыныстар әзірлейді, азаматтар мен ұйымдарға кеңес береді, сондай-ақ қызметтік мүлік, оқ-дәрі және қорғаныс құралдарының сақталуын қамтамасыз етеді.

Сонымен бірге, ҰҚК-ге қосымша функциялар жүктеліп отыр. Енді комитет аумақтық қорғаныс міндеттерін жүзеге асыруға қатысады және мемлекеттік бюджет есебінен қаржыландырылатын жабық әскери нысандардың тізбесін бекітеді.

Жарлық күшіне енді.

Еске салайық, 30 маусымда Президент Қасым-Жомарт Тоқаев Сыбайлас жемқорлыққа қарсы іс-қимыл агенттігін (Антикор) Ұлттық қауіпсіздік комитетінің құрамына енгізу туралы шешім қабылдаған болатын. Ал мемлекеттік қызмет істері агенттігіне сыбайлас жемқорлықтың алдын алу, саясат жүргізу және оны үйлестіру бойынша бірқатар функция берілді.