Үкіметте 2025 жылғы су тасқыны кезеңіне дайындық барысы қаралды

Премьер-министр Олжас Бектеновтің басшылығымен өткен кеңесте 2025 жылғы су тасқыны кезеңіне дайындық мәселелері талқыланды. Негізгі мақсат — су тасқыны қаупін азайтып, халық пен инфрақұрылымды қорғауды қамтамасыз ету. Кеңеске министрліктер мен өңір әкімдері қатысты.

Жиналыста су тасқыны қаупі жоғары аймақтарда жүргізіліп жатқан дайындық жұмыстары баяндалды. Атырау, Қостанай, Түркістан және Батыс Қазақстан облыстарының әкімдері осы бағыттағы шаралар туралы есеп берді. Гидрологиялық болжамдарға сәйкес, алдағы қыста жауын-шашын мөлшерінің көбеюі мүмкін. Су тасқынын болжауды жақсарту үшін өзендерде 31 жаңа гидрологиялық бекет ашылып, 377 бекет, 25 қар өлшеуіш маршрут және 347 метеорологиялық станса іске қосылды.

Су тасқыны кезеңіне дайындықты арттыру мақсатында Үкімет қорғаныс бөгеттерін нығайтып, өзен арналары мен каналдарды тазалау жұмыстарын жүргізді. Көлік және инженерлік инфрақұрылымға өзгерістер енгізу арқылы су тасқынына қарсы алдын алу шаралары қолға алынды. Елді мекендерді қорғайтын топырақ бөгеттері тұрғызылып, қауіпті аймақтардағы су өткізгіш құбырлар мен көпірлер жаңартылып жатыр.

Премьер-министр өңірлерге су тасқынына қарсы шараларды қысқа мерзімде аяқтауды тапсырды. Әсіресе, тасқын қаупі жоғары ауылдық елді мекендерде қар тазалау, азық-түлік пен дәрі-дәрмек қорын дайындау міндеті қойылды. Төтенше жағдайлар министрлігі «Көктем-2025» оқу-жаттығуы аясында нақты іс-шаралар алгоритмін әзірлеп, су тасқыны кезінде жедел әрекет ету шараларын пысықтауға тапсырма алды.