Үкімет заңдарды жасанды интеллектке жаздырмақ

Қазақстан Үкіметі заң шығару үдерісіне жасанды интеллектіні кеңінен қолдануды жоспарлап отыр. Бұл туралы Үкімет отырысында Әділет министрі Ерлан Сәрсембаев мәлімдеді.

Министрдің айтуынша, жасанды интеллектке негізделген арнайы агент заң нормаларын әзірлеудің толық циклін қамтиды. Ол идеяны қалыптастырудан бастап, заң жобасын дайындау, оны іске асыру және кейінгі орындалуын бақылауға дейінгі барлық кезеңге қатысады.

Үкімет отырысында айтылғандай, ЖИ агенті тек заң жобаларын жазумен шектелмей, қабылданған нормалардың тиімділігін талдауға және олардың орындалуын мониторингтеуге де тартылмақ. Сонымен қатар заңнамалық бастамаларды «пакеттік қағидатпен» жүзеге асыру тетігі күшейтілген.

Әділет министрінің дерегінше, артық бюрократияны қысқарту бағытында қазірдің өзінде 25 заң қабылданған. Бұдан бөлек, осы мақсаттағы тағы 10 заң жобасы Парламент қарауында жатыр. Құқықтық мониторинг жүйесі де жаңартылып, енді ол салалық форматта жүргізілмек.

Қазіргі таңда заңнаманың 80 саласы бойынша кешенді талдау жасалған. Үкімет бұл өзгерістердің барлығы заңнаманы тұрақты, икемді әрі тиімді етуге, сондай-ақ мемлекеттік басқарудағы бюрократиялық кедергілерді азайтуға бағытталғанын атап өтті.