Үкімет табысы жоғары азаматтарға мемлекеттік қолдау көрсетуді тоқтатады – Бектенов

Астанада өткен «AMANAT» партиясы фракциясының кеңейтілген жиынында Премьер-Министр Олжас Бектенов әлеуметтік төлемдерді әділ бөлудің маңыздылығына тоқталды. Оның айтуынша, мемлекеттік қолдау шынымен көмекке мұқтаж азаматтарға ғана көрсетілуі тиіс.

«Қазір Еңбек министрлігі әлеуметтік шығындар бойынша мемлекетке түсетін жүктемені оңтайландыруға бағытталған жұмыстарды белсенді түрде жүргізіп жатыр. Мұндағы мәселе шын мәнінде көмекке мұқтаж адамдарға көрсетілетін жәрдемді қысқарту емес. Мәселе – барлық параметр бойынша мұқтаждар санатына жатпайтын адамдарды әлеуметтік қолдау жүйесінен шығару туралы болып отыр», – деді Үкімет басшысы.

Премьер-Министр «Цифрлық отбасы картасы» жобасы арқылы халық алты санатқа бөлінгенін атап өтті. Оның ішінде алтыншы санат – тұрғын үйі, автокөлігі, тұрақты жұмысы бар болса да, мемлекеттен әлеуметтік төлем алып отырған азаматтар.

Бектеновтің айтуынша, Президенттің «масылдық психологиясына қарсы тұру» туралы тапсырмасын орындау үшін цифрландырудың көмегімен табысы жоғары отбасыларға қолдау тоқтатылып, қаржы дағдарысқа тап болған адамдарға бағытталады.

Қазір жаңа скоринг жүйесі Шымкент қаласы мен Қарағанды облысында пилоттық режимде іске қосылған. Жоба сыналған соң барлық өңірлерге таратылады.

«Осы жұмыстың нәтижесінде 2024–2025 жылдары 280–290 млрд теңге үнемделді. Бұл негізінен жергілікті бюджет қаражаты. Келесі жылы, біздің есебімізше, тағы кемінде 165 млрд теңгені үнемдей аламыз. Бұл қомақты қаражатты басым бағыттарға жұмсаймыз», – деді Премьер-Министр.