Үкімет көлеңкелі экономиканың үлесін 2028 жылға қарай 13,8%-ға төмендетпек

Үкімет көлеңкелі экономикаға қарсы іс-қимыл жөніндегі 2028 жылға дейінгі кешенді жоспарды бекітті. Қаулыға премьер-министр Олжас Бектенов қол қойды, деп хабарлады Үкіметтің баспасөз қызметі.

Жоспар адал бәсекені қамтамасыз етуге, бизнестің ашықтығын арттыруға және кәсіпкерлерге жаңа міндет жүктемей, бюджет кірісін көбейтуге бағытталған.

Үкімет мәліметінше, Қазақстандағы көлеңкелі экономиканың үлесі 2019 жылғы 24%-дан 2025 жылдың қорытындысында 16,7%-ға дейін төмендеген. 2028 жылға қарай бұл көрсеткішті 13,8%-ға дейін азайту көзделіп отыр.

Жоспардың негізгі тетігі – жасанды интеллект қолданылатын бірыңғай цифрлық бақылау тұғырнамасы. Ол мемлекеттік органдардың деректерін біріктіріп, көлеңкелі қызмет тәуекелдерін ерте анықтауға мүмкіндік береді.

Кешенді жоспарға сауда, құрылыс, көлік, ауыл шаруашылығы, денсаулық сақтау және білім беру салаларын цифрландыруға арналған 53 шара енгізілген. Сондай-ақ Digital Bazaar электронды жүйесін дамыту, таңбаланатын тауарлар тізімін кеңейту және ұлттық тауарлар тізбесін жетілдіру қарастырылған.

Үкіметтің хабарлауынша, жоспар бизнестің әкімшілік жүктемесін арттырмайды. Негізгі басымдық цифрландыруға, үдерістерді автоматтандыруға, жасанды интеллект пен талдау құралдарын пайдалануға берілген.