Үкімет Алакөл жағалауын қорғауға 3 млрд теңге бөлді

Үкімет Жетісу облысындағы Алакөл жағалауына қорғаныс бөгетін салуға резервтен 3 млрд теңге бөлді. Тиісті қаулыға премьер-министр Олжас Бектенов қол қойды, деп хабарлады Үкіметтің баспасөз қызметі.

Бөлінген қаражатқа ұзындығы алты шақырым болатын бөгет салынады. Оның 2,5 шақырымы Көктұма ауылының, 3,5 шақырымы Ақши ауылының жағалауына тиесілі.

2025 жылы ұзындығы 1,7 шақырым учаскеде жағалауды бекіту, топырақ және бетон жұмыстары жүргізіліп, тас толтырылған торлы құрылымдарды орнату аяқталған. Жаңа қаржы жағалау сызығын нығайтуға және көлдегі шөгінділердің орын ауыстыруы мен қайта таралуын реттеуге жұмсалады.

Үкіметтің мәліметінше, қорғаныс инфрақұрылымын салу жағалауды шайылудан сақтап қана қоймай, өңірдің туристік мүмкіндігін арттыруға да ықпал етеді.

Соңғы екі жылда Ақмола, Ақтөбе, Батыс Қазақстан, Қостанай, Солтүстік Қазақстан және Павлодар облыстарында жалпы ұзындығы 243 шақырым қорғаныс бөгеті мен өзге де инженерлік құрылыс салынып, нығайтылған.