Үкімет 4 баласы бар әр отбасыға 12,8 миллион теңгеден төлейді

Ұлттық статистика бюросының дерегіне көз жүгіртсек, демографияның құлдырап жатқаны байқалады. Мәселен, 2023 жылы елімізде 388 428 мың сәби дүниеге келген. Бұл – соңғы 5 жылдағы ең төмен көрсеткіш. 

Биыл да халықтың табиғи өсімі күрт кеміп, керісінше өлім-жітім көбейген. Дәлірек айтсақ, республика бойынша туудың жалпы коэффициенті 1000 адамға шаққанда 2023 жылғы 19,52 баладан 2024 жылғы қаңтар-наурызда 18,33 балаға дейін кеміген. Ал өлім-жітім керісінше, 1 мың адамға шаққанда өткен жылғы 6,65 адамнан 2024 жылғы үш айда 6,67 адамға дейін көбейе түскен.

Халық тұрмысының төмендеуі, табысының азаюы, балалардың тағамынан бастап, киім-кешегіне дейін бағаның күрт көтерілуі сияқты факторлар демографияның құлдырауына ықпал етіп отыр.

Осыған байланысты AMANAT фракциясының депутаттары демографияны көтеру үшін көрші Ресейдегідей "Аналық капиталды" енгізуді ұсынған. Бірақ Үкімет бұл ұсынысты қабылдамады.

Премьер-министрдің орынбасары Тамара Дүйсенова біздің елімізде берілетін жәрдемақы Ресейдегіден көбірек екенін айтады. Оның айтуынша, Ресейде жәрдемақы бір рет қана беріледі және оны үй алу немесе баланың біліміне құю секілді белгілі бір мақсаттарға ғана жұмсай алады.

"Біздің елімізде қарастырылған жәрдемақының Ресейдегі жүйеден айырмашылығы сол, Қазақстанда төлем анаға ай сайын төленеді және оны қолдану бағытында ешқандай шектеу жоқ. Мысалы, 2024 жылы 4 баласы бар отбасына ай сайын 59 183 теңге төленіп тұрады. Сонда орта есеппен 18 жылда, яғни бала кәмелеттік жасқа толғанға дейін оның анасына бюджеттен жалпы сомасы кем дегенде 12,8 миллион теңге беріледі. Бұл – көрші елдің төлемақысынан бірнеше есеге артық! Әлдеқайда тиімді, әрі жәрдемақы төлемдерінің уақытылы әрі тұрақты төленетініне кепілдік берілген", – дейді Тамара Дүйсенова.

Бірақ 4 баланың тамағы, киімі, дәрі-дәрмегі сияқты қажеттіліктерге ай сайынғы 59 мың теңге жәрдемақы жетпеуі мүмкін. "Ұлттық қор – балаларға" жобасы бала 18 жасқа толғанша 1800 доллар жинауға көмектеседі. Бірақ бұл қаржы да үй алуға немесе баланы ЖОО-да оқытуға жетпейтіні анық.