УЕФА: Қазақстан жасөспірімдер құрамасы «А» лигасының іріктеу кезеңінде бақ сынайды

Ньон қаласындағы УЕФА штаб-пәтерінде футболдан 2027 жылғы Еуропа чемпионатының (U19) екінші іріктеу кезеңінің жеребе тарту рәсімі өтті. Қазақстан жасөспірімдер құрамасы «А» лигасының аясында Бельгия, Шотландия және Косово командаларымен бір топта сынға түседі.

УЕФА жаңа ережелеріне сәйкес, іріктеу кезеңі лигалық жүйе бойынша ұйымдастырылуда. Қазақстандық футболшылар өздерінің алдыңғы нәтижелерінің нәтижесінде элиталық «А» лигасына жолдама алған болатын. Жеребе қорытындысы бойынша, Тимур Қасымов бастаған жасөспірімдер құрамасы 28 командадан құралған «А» лигасындағы жеті топтың біріне орналастырылды.

Естеріңізге сала кетейік, бірінші іріктеу кезеңінде жас қазақстандықтар жоғары деңгейде ойын өрнегін көрсетіп, Португалиямен тең түсіп, Сербияны жеңген болатын. Грекияда өткен мини-турнирдің қорытындысы бойынша құрама топта үшінші орынға табан тіреді.

Турнир ережесіне сай, әр топтағы үздік үш команда «А» лигасындағы өз орнын сақтап қалады. Келесі кезеңге іріктеу матчтары 2027 жылдың көктемінде өтеді. Осы кезеңнің нәтижесінде Чехияда өтетін Еуропа чемпионатының финалдық кезеңіне қатысатын жеті құраманың есімі белгілі болады. Айта кетейік, Чехия турнирді қабылдаушы ел ретінде финалдық кезеңге алдын ала жолдама алған.

Қазіргі таңда іріктеу ойындары өтетін орын мен нақты күнтізбесі әзірге бекітілмеген. Бұл мәліметтер алдағы уақытта УЕФА ресми арналары арқылы жарияланатын болады.