«Тұтынушы не ішіп отырғанын білуі керек»: депутат сүт өнімдерінің дұрыс таңбалануын талап етті

«Ауыл» партиясы фракциясының мүшесі, Мәжіліс депутаты Қарақат Әбден еліміздегі сүт өнімдерінің ашық және нақты таңбалануы мәселесін көтеріп, Премьер-министрге депутаттық сауал жолдады.

Депутаттың айтуынша, бүгінгі таңда нарықта қалпына келтірілген құрғақ сүттен жасалатын өнімдер көбейген, алайда олардың қаптамасында бұл ақпарат толық және түсінікті көрсетілмейді. Осыған байланысты тұтынушы өнімнің нақты қандай шикізаттан жасалғанын біле алмайды.

Әзірленген мемлекеттік зерттеулер де бұл проблеманы растайды:
2025 жылдың 10 айында тексерілген 3000-ға жуық үлгінің 62%-ында таңбалау талаптары бұзылған.

Қарақат Әбденнің айтуынша, мұндай жағдай адал бәсекелестікке зиян келтіреді. Табиғи сүттен өндіріс жүргізетін кәсіпорындар жоғары өзіндік құнмен жұмыс істесе, қалпына келтірілген шикізат қолданатын компаниялар шығынды азайта отырып, өнімді дәл сол бағамен сатуда. Бұл саладағы шынайы өндірушілерді қолдауға кедергі келтіреді.

"Қазақстан – ауыл шаруашылығына негізделген мемлекет. Табиғи өнім өндірісін қолдау елдің азық-түлік қауіпсіздігі үшін маңызды. Қолданыстағы тәжірибе табиғи шикізатпен жұмыс істейтін өндірушілерді жеткілікті деңгейде қолдамай отыр", – деді депутат.

Депутат Үкіметке мынадай ұсыныстар жолдады:

• Сүт өнімдеріне міндетті және нақты таңбалау енгізу: табиғи сүт, қалпына келтірілген сүт, сүтті сусын, ірімшік өнімі деген нақты анықтамалармен.

• Құрамы мен өндіріс тәсілін көрсету ережелерін бірыңғай стандартқа келтіру.

• Сүт нарығындағы шикізат құрылымын жан-жақты талдау: импорт көлемі, бағасы, құрғақ сүттің әсері, табиғи шикізатқа қажеттілік.

• Өндірістегі ашықтықты арттыру және тұтынушыға ақпараттың қолжетімді болуын қамтамасыз ету.

• Табиғи сүт өндірушілерін қолдап, саланың шикізат базасын күшейту.

• Қазақстанда құрғақ және сублимацияланған сүт өндіретін кәсіпорындар ашу мәселесін қарастыру.

• Тұрғындар арасында ақпараттық жұмысты күшейту: табиғи және қалпына келтірілген өнімнің айырмашылығын түсіндіру.

Депутат сүт өнімдерінің сапасы – ұлт денсаулығына тікелей әсер ететін фактор екенін айтып, бұл саладағы ашықтық пен жауапкершілікті күшейту қажеттігін атап өтті.

«Ас – адамның арқауы. Сүт өнімдерінің сапасы мен дұрыс таңбалануы – болашақ ұрпақтың саулығына әсер ететін маңызды мәселе», – деді Қарақат Әбден.