Тұрмыстық зорлық-зомбылыққа қатысты заңға қарсы петиция жарияланды

Петиция 16 маусым күні, яғни әйел құқығы мен балалардың қауіпсіздігі заңы күшіне енген күні жарияланған.  

Петиция авторы Г. Аленаның пікірінше, елімізде күшіне енген “әйел құқығы мен балалардың қауіпсіздігі заңы” зорлық-зомбылыққа қарсы күрес деген атпен отбасының істеріне ерікті және деструктивті араласуға жол береді.  

Алена бұл заңдар ата-анасының жәй шапалағы үшін де баланы отбасынан тартып алатынын, тіпті баламен болған оқыс жағдайлар кезінде де балаға “қауіп тудырды” деп, баланы ата-анасынан айырады дейді. Оның ойынша, бұл заңдар – дәстүрлі бала тәрбиесі үрдісін қылмыс деп тану, баланы ата-анасынан тартып алу, биліктің азаматтардың жеке ісіне шектеусіз араласуына мүмкіндік жасау, ата-ананы озбырлықпен жазалау.  

Петицияда қозғалған тағы бір мәселе, баласын ұрған ата-ана үшін жазалаудың тағы бір қисынсыз түрі – 700 мың теңге айыппұл немесе бір жарым айға қамауға алу. Бұндай жазалауға тап болған отбасыдағы балалар моральды ғана емес, қаржылай да қиындықтарға тап болады. Оған қоса істі болған азаматтың жұмысқа тұруы елімізде қиындық тудартынын айтқан. Осылайша елімізде тірі жетімдер көбеюі мүмкін екенін алға тартқан.  

“Әйел құқықтары мен балалардың қауіпсіздігін қамтамасыз ету”  заңы қоғам үшін қауіпті екенін, бұл заңдар тұрмыстық зорлық-зомбылыққа емес, ата-анаға қарсы бағытталған деп есептейтінін айтып, заңды кері қайтарып, күшін жоюды талап еткен. Оған қоса, ата-аналар "қылмыстық топ” емес екенін айтқан.  

Қазіргі кезде петицияға 147 адам қол қойған.  

Еске сала кетсек, 16 маусым күні Қазақстан Президенті 15 сәуірде қол қойған “ҚР кейбір заңнамалық актілеріне әйелдердің құқықтары мен балалардың қауіпсіздігін қамтамасыз ету мәселелері бойынша өзгерістер мен толықтырулар енгізу туралы” ҚР заңы күшіне енді. Заңда отбасыдағы зорлық-зомбылықтың алдын алу, балаларға қатысты зорлық-зомбылық әрекеттеріне жазалауды қатаңдатуға байланысты 70-тен астам түзетулер бар.  

Дулат Абдраманов