Түрмеде отырып басқарған: Шымкент колледждерінде 1,3 млрд теңге жымқырылған

Қаржылық мониторинг агенттігі Шымкенттегі колледждерде 1,3 млрд теңгеден астам бюджет қаржысының жымқырылуына қатысты тергеуді аяқтады. Ведомство мәліметінше, қылмыстық іс сотқа жолданған.

Тергеу дерегіне сәйкес, 2018–2023 жылдары «Оңтүстік Қазақстан жоғары медициналық колледжі» мен «Оңтүстік Қазақстан гуманитарлық-қаржы колледжі» арқылы жалған оқыту схемасы ұйымдастырылған. Азаматтар оқу орындарына формалды түрде қабылданғанымен, іс жүзінде оқымаған. Соның есебінен мемлекеттік білім беру тапсырысы мен кадрларды қайта даярлау бағдарламалары арқылы қаржы алынған.

Агенттік мәліметінше, схемаға колледж басшылары, бухгалтерлер және өзге де қатысы бар тұлғалар тартылған. Құжаттарды растау үшін электронды цифрлық қолтаңбалар пайдаланылып, жалған бұйрықтар мен атқарылған жұмыс актілері рәсімделген.

Сонымен қатар медициналық колледждің ақылы бөліміндегі кей студенттер мемлекет есебінен оқып жатқан ретінде тіркелген. Ал гуманитарлық-қаржы колледжі іс жүзінде жұмыс істемегені, тек бюджет қаржысын алу үшін пайдаланылғаны анықталған.

ҚМА ұйымдастырушы соңғы үш жылда бұрынғы қаржы жымқыру ісі бойынша түрмеде отырып, заңсыз әрекеттерді сол жерден басқарғанын хабарлады.

Тергеу кезінде күдіктілер 65 млн теңгені ерікті түрде қайтарған. Сот санкциясымен Дубайдағы пәтерді қоса алғанда үш пәтерге, үш тұрғын үй мен үш көлікке тыйым салынды.

Қазіргі уақытта екі күдікті қамауда отыр. Тағы үш адамға елден шықпау туралы бұлтартпау шарасы қолданылған.