Түркиялық компания Алматы әуежайының толық иесіне айналады

«Бәйтерек» ұлттық басқарушы холдингінің еншілес ұйымы Qazaqstan Investment Corporation Алматы халықаралық әуежайындағы 15 пайыз үлесін TAV Airports компаниясына 133 миллион долларға сатты. Бұл туралы компанияның баспасөз қызметі хабарлады.

Мәміле аясында Kazakhstan Infrastructure Fund қорына тиесілі үлес TAV Airports компаниясына өтті. QIC бұл жобаға тікелей инвестициялар қорындағы үлесі арқылы қатысқан.

Компания мәліметінше, Kazakhstan Infrastructure Fund 2021 жылғы сәуірде TAV Airports тобы Алматы әуежайын сатып алған кезде акционерлер құрамына кірген. Қор жалпы құны 415 миллион доллар болған мәміле аясында 30 миллион доллар көлемінде үлестік қаржы салған.

QIC қатысқан кезеңде әуежайда ауқымды жаңғырту жүргізіліп, жолаушылар ағыны екі еседен астам өсті. 2021 жылы әуежай 5,6 миллион жолаушыға қызмет көрсетсе, 2025 жылдың қорытындысында бұл көрсеткіш 11,93 миллион адамға жеткен.

QIC басқарма төрағасының инвестициялық қызмет жөніндегі орынбасары Ғаббас Ержанов мәміле компанияның инвестициялық стратегиясының тиімділігін көрсеткенін мәлімдеді. Оның айтуынша, Алматы әуежайы ел үшін стратегиялық маңызы бар жобалардың бірі саналады.

TAV Airports компаниясы 2021 жылғы сәуірде Алматы әуежайын сатып алу жөніндегі мәмілені аяқтап, нысанның жұмысын басқаруға кірісті. Сол кездегі мәміле құны 365 миллион доллар болған. Компания әуежайдың, сондай-ақ отын жеткізу және жолаушыларды тамақтандыру қызметтерін көрсететін кәсіпорындардың 85 пайыз акциясына иелік етті. Қалған 15 пайыз үлес Kazakhstan Infrastructure Fund қорында болған.