Түркиядағы наразылық: Стамбұлдағы елшілік қазақстандықтарға үндеу жасады

Қазақстан Республикасының Түркиядағы елшілігі елдегі ахуалдың шиеленісуіне байланысты Түркияда жүрген Қазақстан азаматтарына үндеу жасады.

«Қалыптасқан жағдайға байланысты халық көп жиналатын орындарға бармауға, демонстрациялар мен митингілерге қатысудан аулақ болуға шақырамыз. Сондай-ақ қауіпсіздік шараларын күшейтіп, қырағылық пен сақтық танытып, жаңалықтарды мұқият бақылап, жергілікті биліктің нұсқаулықтарын орындауға және Қазақстанның Түркиядағы дипломатиялық өкілдіктерімен үнемі байланыста болуға кеңес береміз», – делінген елшіліктің хабарламасында.

Сонымен қатар елшілік әлеуметтік желілерде митингілер мен наразылық акциялары туралы ақпаратты таратпауды және оқиғаларға қатысты жеке бағалау мен пікір білдіруден бас тартуды сұрады.

Қажет жағдайда Қазақстанның Түркиядағы өкілдіктерімен мына телефондар арқылы байланысуға болады:

• Анкарадағы Елшілік: +90 535 273 44 96

• Ыстанбұлдағы Бас консулдық: +90 501 262 14 65

• Анталиядағы Бас консулдық: +90 539 440 05 22

• Измирдегі Бас консулдық: +90 553 099 87 89

Айта кетейік, бұған дейін Түркия президенті Режеп Тайып Ердоғанның басты саяси қарсыласы – Ыстанбұл қаласының мэрі Экрем Имамоглу мен оның баспасөз кеңесшісі Мұрат Онгун арнайы операция барысында тұтқындалып, сотқа берілген еді. Қазіргі уақытта Түркиядағы наразылық шаралары әлі де жалғасып жатыр.