Түркияда футбол жанжалы: 8 адам қамауға алынып, 1024 ойыншы шеттетілді

Түркия үкіметі футбол матчтарына заңсыз бәс тіккені үшін сегіз адамды, соның ішінде жоғары деңгейлі клуб басшысын қамауға алды. Сонымен қатар Түркия футбол федерациясы (TFF) тергеу аяқталғанға дейін 1024 футболшының кәсіби қызметін уақытша тоқтатқанын мәлімдеді. Бұл жөнінде Anadolu агенттігі хабарлады.

Тергеу аясында «Эюпспор» клубының басшысы Мұрат Өзкая және тағы жеті адам ұсталған. Клуб өкілдері бұл оқиғаға қатысты түсініктеме беруден бас тартқан.

Федерация мәлімдемесінде 1024 ойыншының ісі Профессионалды футбол тәртіп кеңесіне (PFDK) жіберілгені айтылған. Олардың арасында Түркияның ең ірі клубтары — «Галатасарай» мен «Бешікташтың да футболшылары бар.

TFF басшылығы клубтарға құрамдағы бос орындарды толтыру үшін мүмкіндік беру мақсатында FIFA-мен 15 күндік қосымша ішкі трансфер кезеңін ашу жөнінде келіссөздер жүргізіп жатқанын жеткізді.

Сонымен қатар екінші және үшінші лигалардағы ойындар екі аптаға тоқтатылды. Түркия футбол федерациясы кеңесі 11 қарашада жағдайды талқылау үшін шұғыл жиын өткізбек.

TFF президенті Ибрахим Хажиосманоғлы бұл жағдайды «түрік футболындағы моральдық дағдарыс» деп атады. Оның айтуынша, тексеріс барысында елдегі 571 белсенді төрешінің 371-інің атына бәс тігуге арналған есепшот тіркелген, ал 152 төреші нақты түрде заңсыз бәс тігуге қатысқан.

Тіпті кей төреші мыңдаған ойынға бәс тіккен: олардың бірі 18 227 матчқа, ал 42 төреші әрқайсысы 1000-нан астам ойынға ақша қойғаны анықталған.