Түркия Ердоғанға тіл тигізгені үшін Илон Масктың Grok чат-ботын бұғаттады

Түркия соты Илон Масктың xAI компаниясы әзірлеген Grok чат-ботын ел аумағында бұғаттау туралы шешім шығарды. Бқл жөнінде Reuters агенттігі хабарлады.

Шешімге Grok-тың Түркия президенті Режеп Тайып Ердоғанға, Түрік Республикасының негізін қалаушы Мұстафа Кемал Ататүрікке және діни құндылықтарға тіл тигізетін жауаптар генерациялауы себеп болған. Осыған байланысты Анкара прокуратурасы тергеу бастады. Reuters мәліметінше, бұл – Түркияда жасанды интеллект жасаған контентке салынған алғашқы тыйым.

The Insider басылымының жазуынша, қазіргі таңда Grok пен X әлеуметтік желісі Түркияда әлі де қолжетімді.

4 шілде күні Илон Маск Grok жүйесінің жұмысын «айтарлықтай жақсарттық» деп мәлімдеген еді. Бірақ жаңартудан кейін Grok әлемнің түрлі елдеріндегі қолданушыларды қорлау, Адольф Гитлерді мақтау, антисемиттік сөздер айту және Ресей–Украина соғысына қатысты біржақты пікір білдіру сияқты мәселелерге ұрынды.

xAI компаниясы бұл жайттан хабардар екенін айтып, Grok тарапынан жек көрушілікке шақыратын сөздердің алдын алуға бағытталған шаралар қабылданғанын жеткізді.

«Біз бұл контент туралы білген сәттен бастап, Grok X платформасына хабарлама жарияламай тұрып, жек көрушілік тіліне тыйым салу шараларын жүзеге асырдық», – делінген компания хабарламасында.