Түркістанда жаңа өндіріс орындарының құрылысы қатаң бақылауға алынды

Түркістан облысында өңір экономикасын дамыту, инвестиция тарту және жаңа жұмыс орындарын құру бағытындағы жұмыстар жандана түспек. Облыс әкімі Нұралхан Көшеровтің төрағалығымен өткен кеңейтілген мәжілісте инвестициялық жобалардың орындалу барысы мен «TURAN» арнайы экономикалық аймағының (АЭА) даму жоспары сараланды, деп хабарлайды Түркістан облысы әкімінің баспасөз қызметі.

Мемлекет басшысы Қасым-Жомарт Тоқаевтың өңірлердің экономикалық әлеуетін арттыру жөніндегі тапсырмасына сәйкес, облыста әрбір жобаның уақытылы әрі сапалы жүзеге асырылуына басымдық беріліп отыр. Жиын барысында өңір басшысы міндеттемелерін орындамай отырған инвесторларға қатысты қатаң шаралар қолданылатынын ескертті.

«Президент инвестиция тарту мен өндірісті дамытуға ерекше мән беріп отыр. Әрбір жоба – жаңа жұмыс орны, жаңа өндіріс, халықтың әл-ауқатын арттыруға қосылған үлес. Сондықтан бірде-бір жоба қағаз жүзінде қалып қоймауы тиіс. Егер инвестор өзіне алған міндеттемесін орындай алмаса, заң талаптарына сәйкес жер телімін мемлекетке қайтарып, оны жұмыс істеуге дайын басқа инвесторларға беру керек», – деді Нұралхан Көшеров.

«TURAN» АЭА және индустриялық аймақтардың көрсеткіштері

Облыстық өнеркәсіп және индустриялық-инновациялық даму басқармасының мәліметінше, жалпы аумағы 3603,3 гектарды құрайтын «TURAN» АЭА аумағында 2019 жылдан бері жалпы құны 1 триллион 263 миллиард теңгені құрайтын 140 инвестициялық жоба тіркелген. Бүгінгі таңда оның 58-і іске қосылып, 3243 тұрақты жұмыс орны ашылды. Толық жүзеге асырылғанда 13 мыңнан астам жаңа жұмыс орнын құру жоспарланған.

• Түркістан қаласындағы өнеркәсіптік аймақта (290 га) құны 157 млрд теңге болатын 14 жоба тіркелген, оның 6-уы іске қосылған;

• Сауран индустриялық аймағында (365 га) құны 86,9 млрд теңгені құрайтын 8 жоба жүзеге асырылуда;

• Кентау қаласындағы өнеркәсіптік аймақта 7 жобаның 5-уі іске қосылған;

• «Орталық Азия» халықаралық өнеркәсіптік кооперация орталығында құны 102,1 млрд теңге болатын 5 жоба тіркелген.

Бюджет түсімі және инфрақұрылымды дамыту

Үкімет қаулысына сәйкес АЭА аумағы оңтайландырылып, пайдаланылмай жатқан әкімшілік-іскерлік және тарихи аймақтардың бір бөлігі жалпы қолданысқа қайтарылды. Бұл шешім Түркістан қаласының бюджетіне жер мен мүлік салығы бойынша жыл сайын шамамен 657,7 миллион теңге қосымша кіріс әкеледі.

Жиын соңында облыс әкімі құрылыс кестесінен кешігіп жатқан 8 жоба бойынша нақты іс-қимыл алгоритмін әзірлеуді, сондай-ақ индустриялық аймақтардағы инженерлік-инфрақұрылым, электр қосалқы станциялары мен жер мәселелерін тез арада шешуді тапсырды. Оған қоса, «TURAN» АЭА аумағын 27,5 гектарға кеңейту және аумақтардағы қауіпсіздік пен абаттандыру жұмыстарын күшейту жөнінде бастамалар мақұлданды.