Түркістанда Ұлттық кітап күніне орай «120 кітап – 120 рухани шамшырақ» акциясы өтті

Ұлттық кітап күні мерекесі аясында Түркістан облыстық «Фараб» әмбебап ғылыми кітапханасы мен Ы. Алтынсарин атындағы облыстық балалар кітапханасының ұйымдастыруымен «120 кітап – 120 рухани шамшырақ» атты кең ауқымды іс-шара жүзеге асырылды.

Мерекелік бастаманың негізгі мақсаты – қоғамда кітап оқу мәдениетін қалыптастыру, оқырман белсенділігін арттыру және ұлттық рухани құндылықтарды насихаттау болып табылады. Акция барысында қала тұрғындары мен қонақтарына әртүрлі жанрдағы 120 дана құнды әдебиет тегін таратылды.

Таратылған әдебиеттер қатарында әлемдік классика, отандық жазушылардың туындылары, балалар әдебиеті және танымдық еңбектер қамтылды. Кітапхана мамандары қала тұрғындарымен кездесіп, кітаптың адам өміріндегі маңызы мен білім алудың артықшылықтары туралы ақпараттық-түсіндіру жұмыстарын жүргізді.

Акция әрбір азаматтың интеллектуалды дамуына жол ашып, кітапхана мен оқырман арасындағы алтын көпірді нығайтуға бағытталған.

Ұйымдастырушылардың айтуынша, бұл бастама тек мерекелік шарамен шектелмей, облыс көлемінде оқу мәдениетін дамытуға бағытталған жүйелі жұмыстардың жалғасы болмақ. 120 кітап – өңір тұрғындары үшін жаңа білім мен рухани кемелдікке бастайтын мүмкіндік ретінде ұсынылды.