Түркістанда түркі халықтарына тән асыл тұқымды иттер көрмесі өтті

Түркістан қаласында Түркі мемлекеттері ұйымының (ТМУ) бейресми саммитіне дайындық аясында «Жеті қазынаның бірі – ит» атты асыл тұқымды иттердің халықаралық көрмесі ұйымдастырылды. Шараның басты мақсаты – түркі халықтарының ортақ мәдени мұрасын, соның ішінде көшпелі өркениеттен бастау алатын бірегей ит тұқымдарын дәріптеу және таныстыру.

Маңызды мәдени шараны Қазақстан Республикасы Премьер-министрінің орынбасары – Мәдениет және ақпарат министрі Аида Балаева арнайы барып тамашалады.

Көрме аясында Түркіменстанның атақты алабайы, Өзбекстанның бөрібасары, Орта Азия төбеті және қазақтың ұлттық мақтанышы – тазы тұқымдары көпшілік назарына ұсынылды. Сонымен қатар, шараға қатысушылар әзірбайжандық гурдбасар, анадолылық ақбаш және қырғыздың тазысы саналатын тайған секілді сирек кездесетін ит түрлерімен танысуға мүмкіндік алды.

Ұйымдастырушылардың атап өтуінше, ұсынылған ит тұқымдарының әрқайсысы түркі халықтарының тұрмыс-салтымен, тарихымен және географиялық ерекшеліктерімен тығыз байланысты. Олар ғасырлар бойы көшпенділердің сенімді серігі болып, мал мен қонысты қорғауға, аңшылыққа және таулы-далалы аймақтардағы қауіпсіздікті қамтамасыз етуге бейімделген.

Шара Түркістан облысының Өңірлік коммуникациялар қызметінің қолдауымен жарияланды.