Түркістанда толық циклді тоқыма өндірісін қамтитын мақта агроөнеркәсіп кешені іске қосылды

Түркістан қаласында тоқыма өнеркәсібінің жаңа кезеңі басталды. «Turan» арнайы экономикалық аймағында толық циклді тоқыма өнімдерін шығаратын мақта агроөнеркәсіп кешені іске қосылды. Атап айтқанда, жіп иіру және мата өндіруге маманданған «Түркістан тоқыма» (Kazakhstan Lihua) жауапкершілігі шектеулі серіктестігінің ірі өндірістік кешені өз жұмысын бастады. Бұл жоба өңір ғана емес, ел көлеміндегі жеңіл өнеркәсіптің дамуы үшін маңызды қадам саналады.

Кәсіпорынның ашылу салтанатына Түркістан облысының әкімі Нұралхан Көшеров қатысты. Ол жаңа өндіріс Мемлекет басшысы Қасым-Жомарт Тоқаевтың Қазақстан халқына Жолдауында айтылған өңдеу өнеркәсібін дамыту, шикізатқа тәуелділіктен арылу міндеттерімен толық сәйкес келетінін атап өтті. Әкімнің айтуынша, мақта кластерін дамыту – өңір үшін басым бағыттардың бірі.

– Мемлекет басшысы Жолдауында дайын өнім шығаруға көшу қажеттігін нақты айтты. Түркістан облысында біз мақта кластерін жүйелі түрде дамыта бастадық. Бұл бізге мақта-шикізаттың сыртқы нарықтағы бағасына тәуелді болмауға және мыңдаған жаңа жұмыс орнын ашуға мүмкіндік береді. Алдағы бес жылда мақта өсіруден бастап, дайын киім тігетін толық циклді кәсіпорындар құрылады. «Түркістан тоқыма» – осы бағыттағы алғашқы әрі аса маңызды жоба. Біздің мақсат – тек шикізат экспорттау емес, жоғары қосылған құны бар өнім шығару. Инвестиция тарту арқылы Түркістан облысы дотациялық өңірден өзін-өзі қамтамасыз ететін индустриялық аймаққа айналады, – деді Нұралхан Көшеров.

Өндірістік кешеннің жалпы инвестициялық құны 86,2 млрд теңгені құрайды. Жобаға «Turan» арнайы экономикалық аймағынан 42 гектар жер бөлінген. Құрылыс жұмыстары 2024 жылы басталып, биыл алғашқы кезең іске қосылды. Қазіргі таңда 430 адам тұрақты жұмыспен қамтылды. Ал 2026 жылдың желтоқсанына дейін зауыттың қалған үш кезеңін толық аяқтау жоспарланып отыр. Соның нәтижесінде қосымша шамамен 2000 адам жұмысқа орналасады. Бұл Түркістан облысы үшін маңызды әлеуметтік-экономикалық көрсеткіш болып саналады. Жаңа жұмыс орындары халықтың әл-ауқатын арттырып, ішкі көші-қонды азайтуға және білікті кадрларды өңірде сақтауға ықпал етеді.

Кәсіпорын толық қуатына шыққан кезде жыл сайын 11,4 мың тонна жіп, 47,3 млн шаршы метр мата, 2 млн төсек-орын жиынтығы және 4 млн көрпе өндіру жоспарланып отыр. Бұл көрсеткіштер отандық жеңіл өнеркәсіптің импортқа тәуелділігін азайтып, ішкі нарықты сапалы қазақстандық өніммен қамтамасыз етуге мүмкіндік береді. Сонымен қатар өнімнің едәуір бөлігі экспортқа бағытталады.

Сарапшылардың пікірінше, жоба Түркістан өңіріндегі жеңіл өнеркәсіптің жүйелі дамуына, мақта саласының тиімділігін арттыруға және экспорттық әлеуетті күшейтуге серпін береді. Арнайы экономикалық аймақтың мүмкіндіктері отандық және шетелдік инвесторлар үшін тартымды өндірістік алаң қалыптастыруға жол ашады. «Түркістан тоқыма» жобасы – өңір экономикасын әртараптандыруға, жаңа индустриялық бағыттарды дамытуға және Түркістанды жаңа экономикалық орталыққа айналдыруға бағытталған нақты қадам.

Айта кетейік, қазіргі таңда Түркістан облысында жалпы құны 53 млрд теңгеге жуық импортты алмастыратын 20 жоба іске асырылуда. Индустриялық аймақтарда жалпы құны 152 млрд теңгені құрайтын 99 инвестициялық жоба жүзеге асырылып жатыр. Бұл жобалар 6361 жұмыс орнын ашуға мүмкіндік береді. Бүгінде оның 50-і іске қосылып, 2609 адам тұрақты жұмыспен қамтылған.

Ал «Turan» арнайы экономикалық аймағында жалпы құны 211,8 млрд теңгені құрайтын 28 ірі жоба жүзеге асырылып жатыр.