Түркістанда «Күй құдіреті» дүбірлі додасы басталды

Ұлттық домбыра күні аясында Түркістан қаласында республикалық «Күй құдіреті» күйшілер байқауы өз бастауын алды. Еліміздің барлық өңірінен жиналған өнерпаздар қатысып жатқан бұл ауқымды шара дәстүрлі күй өнерін кеңінен насихаттауды, ұлттық музыкалық мұраны дәріптеуді және жас таланттардың кәсіби шеберлігін шыңдауды көздейді, деп хабарлайды Түркістан облысы әкімінің баспасөз қызметі.

Түркістан облысының әкімі Нұралхан Көшеровтің қолдауымен ұйымдастырылған мәдени жобаның алғашқы кезеңінде қатысушылар шертпе күйдің хас шеберлері Сүгір Әлиұлы мен Төлеген Момбековтің шығармаларын орындады. Қазылар алқасының шешімімен ең үздік деп танылған күйшілер сайыстың келесі сатысына жолдама алды.

Республикалық додаға еліміздің мәдениет және өнер саласының белгілі майталмандары төрелік етуде:

Кәрима Сүндетқызы - Қазақстанның еңбек сіңірген қайраткері, Құрманғазы атындағы Қазақ ұлттық консерваториясының профессоры;

Шыңғыс Бөріұлы - ҚР Мәдениет саласының үздігі, «Сүгір» атындағы қазақ ұлт-аспаптар оркестрінің бас дирижері;

Батырлан Әлкеев - ҚР Мәдениет саласының үздігі, Күләш Байсейітова атындағы Қазақ ұлттық өнер университетінің факультет деканы.

Бүгін сағат 18:00-де «Керуен сарай» туристік кешенінде байқаудың екінші кезеңі өтеді. Бұл турда үміткерлер қазақ ұлт-аспаптар оркестрінің сүйемелдеуімен Сүгір Әлиұлының «Ілме» күйін және Қаршыға Ахмедияровтың туындыларын орындайтын болады.

Сонымен қатар мерекелік кеш аясында Қазақстанның халық әртісі Айгүл Үлкенбаева мен күйші-композитор Ғаламат Бейсеқожа арнайы бағдарламамен өнер көрсетеді.

Жалпы, Түркістан өңірінде руханият пен мәдениет саласын дамыту, оның ішінде дәстүрлі айтыс, термешілер мен күйшілер сайысын тұрақты ұйымдастыру жұмыстары жүйелі жолға қойылған.