Түркістанда хоккейден жастар арасындағы кубок бәсекесі басталды

Түркістан шаһары тарихта алғаш рет жастар арасындағы хоккейден өтіп жатқан «QAZAQSTAN KUBOGY» турнирінің топтық кезеңін қабылдап жатыр,деп хабарлайды Түркістан облысы әкімдігінің баспасөз қызметі.

Ел біріншілігіне Қазақстанның түрлі аймақтарынан жиналған 13 ұжым қатысып, үш бөлек топқа бөлінген. Бұл беделді бәсекенің ойындары бір мезетте Түркістан, Павлодар және Теміртау қалаларында ұйымдастырылуда.

Оның ішінде Түркістандағы мұз айдынында «С» тобының бәсекелері өтуде. Мұнда отандық хоккейдің белді ұжымдары — Өскеменнің «Торпедосы», Петропавлдың «Құлагері», «Алматы» клубы және алаң иелері «Turan Tigers» командасы күш сынасып жатыр.

Түркістандағы тартысты турнирдің шымылдығы 27 тамызда «Торпедо» мен «Құлагер» матчымен ашылды. Ал сағат 19:00-де мұз айдынына жергілікті «Turan Tigers» пен «Алматы» командалары шықты. Спортшыларға қолдау білдіру үшін арнайы келген Түркістан облысының әкімі Нұралхан Көшеров бұл маңызды кездесуге куә болды.

Жергілікті жанкүйерлер үшін бұл ойынның орны ерекше. Себебі «Turan Tigers» өз жанкүйерлерінің алдында алғаш рет елдің ең басты кубоктарының бірін сарапқа салуды бастап кетті.

«Түркістан Мұз Сарайындағы» кездесулер тізбегі ары қарай жалғасады. 28 тамыз күні түркістандықтар өскемендік «Торпедомен» шеберлік байқасса, 30 тамызда «Құлагерге» қарсы топтық кезеңдегі соңғы ойынын өткізеді.

Осы іріктеу кезеңінде үздік шыққан командалар кубоктың шешуші бәсекелеріне жолдама алады. Ал турнирдің жартылай финалы мен финалдық ойындары 2–3 қыркүйек аралығында Теміртау қаласында ұйымдастырылады. «QAZAQSTAN KUBOGY» жас хоккейшілердің шеберлігін шыңдап, еліміздің әр өңіріндегі хоккей мектептерін бір алаңда тоғыстыратын маңызды спорттық дода.