Түркістанда ауылдарға интернет тартылып, 8000 жаңа бейнекамера орнатылатын болды

Түркістан облысы цифрландыру мен жоғары жылдамдықты интернет инфрақұрылымын дамытуда жаңа деңгейге көтеріліп жатыр. Өңір басшысы Нұралхан Көшеровтің төрағалығымен өткен мәжілісте облыстағы интернет сапасы, қауіпсіздік жүйелері және жасанды интеллектті қолдану барысы сөз болды, деп хабарлайды Түркістан облысы әкімінің баспасөз қызметі.

Бүгінде облыстағы 801 елді мекеннің 769-ы заманауи 4G және 3G желілерімен қамтамасыз етілген. Ал қалған 32 ауылды кезең-кезеңімен желіге қосу жұмыстары жүріп жатыр. Оған қоса, өңірдегі 196 аумақта жоғары жылдамдықты 5G базалық станциясы іске қосылды.

Бұған дейін байланыс сапасы төмен болған 95 елді мекеннің 72-сіндегі мәселе толық шешімін тапты, ал қалған 23 аумақ жыл соңына дейін реттелмек. Сонымен бірге, «Қолжетімді интернет» ұлттық жобасы аясында 372 ауылға талшықты-оптикалық байланыс желілері тартылуда.

Жасанды интеллект пен жаппай бейнебақылау

Өңірде қоғамдық қауіпсіздікті қамтамасыз ету бағытында да ауқымды жобалар қолға алынды:

• 8 000 жаңа камера: Қазіргі 1 834 бейнебақылау камерасына қоса, мемлекеттік-жекешелік әріптестік аясында тағы 8 мың камера мен 750 аппараттық-бағдарламалық кешен орнату басталды.

• Smart-технологиялар: Мектептердегі интернет жылдамдығын онлайн бақылау, әкімдік жұмысына арналған жасанды интеллект көмекшісі, заңсыз құрылыстарды геопортал арқылы анықтау және 109 бірыңғай байланыс орталығын цифрландыру жобалары іске асырылуда.

Жиынды қорытындылаған Нұралхан Көшеров байланыс операторлары ұсынатын тарифтердің тиімділігіне талдау жасап, нақты ұсыныстар енгізуді жүктеді. Оған қоса, 5G желісін дамыту, цифрландыру мен жасанды интеллектіні енгізу бойынша арнайы Жол картасын әзірлеп, ай сайын есеп беруді тапсырды.