Түркістанда 1000 қуаттық газ станция салынуда

Қазақстанның оңтүстігіндегі энергия тапшылығы мәселесі түбегейлі шешілмек. Премьер-министр Олжас Бектенов Түркістан облысының Сайрам ауданында салынып жатқан заманауи бу-газ қондырғысының (БГҚ) құрылыс барысын өз бақылауына алды.

Жаңа электростанция Siemens Energy компаниясының төрт газ турбинасымен, төрт қазандықпен және екі бу турбинасымен жабдықталады. Бұл технология шығатын газдардың жылуын қайта пайдалану арқылы қосымша қуат өндіруге мүмкіндік береді. Ол тек тиімді емес, сонымен қатар экологиялық тұрғыдан таза және желідегі қуат тапшылығын қас-қағым сәтте толтыра алатын икемділікке ие.

Бүгінде Түркістан облысы 445 МВт энергия тұтынғанымен, өз ішінде небәрі 136,5 МВт өндіреді. Яғни, өңір сыртқы көздерге айтарлықтай тәуелді. Қуаттылығы 1000 МВт болатын жаңа станция бұл тапшылықты толық жауып қана қоймай, ең жоғары жүктеме кезінде бүкіл энергия жүйесінің тұрақтылығын қамтамасыз етеді.

Құрылыс алаңында қазірдің өзінде мыңнан астам маман мен 150 бірлік техника еңбек етуде. Маңызды құрылымдардың іргетасы қаланып, негізгі турбиналар орнатылды. Нысанды 2026 жылдың соңына дейін пайдалануға беру жоспарланған.