Түркістан тұрғыны жүкті әйелін тексеруге келген фельдшерді ұрып-соққан

Түркістан қаласында жедел жәрдем станциясының 26 жастағы фельдшері Құдырет Мүтәліпов қызметтік міндетін атқару кезінде соққыға жығылды. Ол 26 тамыз күні шақыртумен жүкті әйелді тексеруге келген.

Әйел ішінің төменгі жағы қатты ауырғанын айтқан. Оның жүктілігіне қауіп бар-жоғын анықтау үшін дәрігер тексеріс бастаған. Сол кезде оның жұбайы фельдшерге алдымен жұдырық жұмсап, кейін тепкілеп тастаған.

Салдарынан Құдырет Мүтәліпов жабық бас сүйек-ми жарақатын алып, миы шайқалған. Қазір ол ауруханада жатыр, жағдайы орташа ауыр. Дәрігерлердің айтуынша, ем-дом кемінде екі аптаға созылады.

Полицияның мәліметінше, оқиғаға байланысты қылмыстық іс қозғалған.

«Алдын ала деректерге сәйкес, науқасты тексеру кезінде оның күйеуі фельдшерге дене жарақатын салған. Тергеу нәтижелері бойынша тиісті процессуалдық шешім қабылданады», – деп хабарлады Түркістан облыстық ПД.

Дегенмен кейін тараптар татуласқаны белгілі болды. Оқиға еңбек инспекциясында тіркелді, ал зардап шеккен тарап полицияға арыз жазбаған.

Айта кетейік, Қазақстанда дәрігерлерге қол көтергендерге қатысты жазаны қатаңдату қарастырылып жатыр. Жаңа заң жобасына сәйкес, медицина қызметкерлеріне қол көтергені үшін 15 жылға дейін бас бостандығынан айыру жазасы ұсынылып отыр.