Түркістан облысының тауларында ер адам қаза тапты

Түркістан облысындағы таулы жерде 48 жастағы ер адам қаза тауып, оның 33 жастағы серігін құтқарушылар тікұшақпен эвакуациялады. Бұл туралы Төтенше жағдайлар министрлігі хабарлады.

Құтқару жұмыстары Төле би ауданындағы Ақсу-Жабағылы мемлекеттік табиғи қорығы аумағында, теңіз деңгейінен 2400 метр биіктіктегі Шұңқылдық асуында жүргізілді.

Оқиға туралы хабарды марқұмның серігі жеткізген. Оның айтуынша, досының денсаулығы күрт нашарлап, тауда қайтыс болған. Өзі де сырқаттанып, төменге өздігінен түсе алмаған.

Оқиға орнына Төтенше жағдайлар министрлігінің күштері мен «Қазавиақұтқару» тікұшағы жіберілді. Құтқарушылар 33 жастағы ер адамды таудан түсіріп, дәрігерлерге тапсырды. Оған медициналық көмек көрсетілді, ауруханаға жатқызу қажет болмаған.

Қаза болған ер адамның денесі де таудан түсірілді. Алдын ала мәлімет бойынша, ол жартастан құлап мерт болған.

Төтенше жағдайлар министрлігі тауға шығар алдында жақындарына бағытты хабарлауды, ауа райын ескеруді, байланыс құралы, су, дәрі қобдишасы мен қажетті дәрі-дәрмек алып жүруді ескертті.