Түркістан облысының бірқатар өңірінде сайлау күні қоғамдық көлік тегін қатынайды

Құрылтай депутаттарының сайлауы өтетін 23 тамыз күні Түркістан облысының тұрғындарын елеулі жеңілдік күтіп тұр. Маңызды саяси науқан күні азаматтардың сайлау учаскелеріне еш кедергісіз әрі жылдам жетуін қамтамасыз ету мақсатында өңірдегі бірқатар елді мекенде қоғамдық көліктер тегін қызмет көрсетеді.

Бұл жеңілдік Түркістан мен Арыс қалаларында, сондай-ақ Қазығұрт ауданында қолданысқа енгізілмек. Аталған аймақтарда тұрғындар дауыс беру учаскелеріне дейін қоғамдық көлікпен тегін қатынай алады.

Жалпы Түркістан облысы бойынша 1 204 659 дауыс беруші тіркелген болса, олар үшін 952 сайлау учаскесі жұмыс істейтін болады. Ұйымдастырушылардың айтуынша, бұл бастама тұрғындардың уақытын үнемдеп, әсіресе қоғамдық көлікке тәуелді азаматтардың шалғайдағы учаскелерге оңай жетуіне үлкен қолдау болады.