Түркістан облысының әкімі кәсіпкерлерге жақсы жаңалық жеткізді: өндірістік орындар арзан бағамен беріледі

Түркістан облысының әкімі Нұралхан Көшеров Орталық коммуникациялар қызметінде өткен брифингте өңірдің әлеуметтік-экономикалық дамуы туралы баяндама жасап, журналистердің сұрақтарына жауап берді.

Баспасөз өкілдері әкімнен салынып жатқан 21 шағын өндірістік алаңға кәсіпкерлердің қолжетімділігі туралы сұрады. Яғни, станок сатып алған кез келген кәсіпкер өндірістік алаңға барып, бірден жалға орын алып жұмысын бастай ала ма деген сауал қойылды.

Облыс әкімі бұл мүмкіндіктің бар екенін растады.

«Әрине, жұмыс істей аласыз. Онда жалға алу қарастырылған. Бағасы да қолжетімді: бір шаршы метрі 1000 теңгеден аспайды, нақтысы – 998 теңге. Қосымша мүмкіндік ретінде оны несиеге 10 жылға 3% мөлшерлемемен сатып алуға болады», – деді Көшеров.

Әкімнің айтуынша, шағын өндіріс алаңдары кәсіпкерлер үшін инфрақұрылымы дайын, қолжетімді әрі жеңілдетілген шарттармен ұсынылады. Жобаның мақсаты – өңірде шағын және орта бизнес қарқынын арттыру.