Түркістан облысында өңдеу өнеркәсібі мен инвестиция тарту қарқыны артты

Түркістан облысында әлеуметтік-экономикалық даму бағытындағы жүйелі шаралар оң нәтижесін беруде. Осы жылдың қаңтар-сәуір айларының қорытындысы бойынша аймақ экономикасының әлеуметтік-экономикалық дамуында тұрақты өсім динамикасы сақталды, деп хабарлайды Түркістан облысының әкімдігі.

Қысқа мерзімді экономикалық өсім 125,2%-ды құрап, облыс республика бойынша 1-орынға шықты. Салалық көрсеткіштер мен бюджеттің атқарылу барысы облыс әкімінің орынбасары Қанат Қайыпбектің төрағалығымен өткен жиында қаралды.

Жиын барысында облыс әкімінің орынбасары тұрақты экономикалық өсімді сақтау үшін инвестициялық жобаларды уақытылы іске асыру мен әлеуметтік инфрақұрылым нысандарының құрылысын сапалы жүргізудің маңыздылығын атап өтті. Қанат Қайыпбек жауапты тұлғаларға өңірлер кесіндісіндегі декомпозицияланған жоспардың орындалуын бақылауды және республикалық әрі облыстық бюджеттен бөлінген қаражаттың мерзімінде, сапалы игерілуін қамтамасыз етуді тапсырды.

Облыстық экономика және бюджеттік жоспарлау басқармасының басшысы Күмісбек Жаппардың есебіне сәйкес, есепті кезеңде негізгі экономикалық салаларда жоспарлы межелер толық орындалған:

 Өнеркәсіп өнімінің көлемі: 571,7 миллиард теңгеге жетіп, өсім өткен жылдың тиісті кезеңімен салыстырғанда 133%-ды құрады.

 Өңдеу өнеркәсібі: 272,7 миллиард теңгенің өнімі өндіріліп, өсім 156,5% деңгейінде қалыптасты.

 Тау-кен өндірісі: Өнім көлемі 244,7 миллиард теңгеге жетіп, өсім 117,6%-ды көрсетті.

 Ауыл шаруашылығы: Сәуір айының қорытындысымен 205,9 миллиард теңгенің өнімі өндіріліп, өсім қарқыны 111,3%-ды құрады.

 Инвестиция және құрылыс: Жыл басынан бері негізгі капиталға 470,2 миллиард теңге инвестиция бағытталып (өсім 157,4%), құрылыс жұмыстарының көлемі 95,8 миллиард теңгені (өсім 110,3%) құрады.

Облыстық қаржы және мемлекеттік активтер басқармасының басшысы Гульфари Ажиметованың мәлімдеуінше, осы жылдың 1 мамырындағы жағдай бойынша өңірде түсімдер жоспары 105%-ға орындалды. Нәтижесінде бюджетке жоспардан тыс 22,7 миллиард теңге қаржы түсті. Бұл көрсеткіш негізінен облыстың өзіндік кірістері есебінен қамтамасыз етілген.

Өңірдің негізгі әлеуметтік-экономикалық даму мәселелері облыс басшылығының қатаң бақылауында және бұл бағыттағы жұмыстар жүйелі түрде жалғасады.