Түркістан облысында оқушыны жүкті еткен 70 жастағы зейнеткер сотталды

Түркістан облыстық қылмыстық істер жөніндегі мамандандырылған ауданаралық соты кәмелетке толмаған оқушы қызды зорлап, жүкті етті деп айыпталған 70 жастағы зейнеткерге қатысты үкім шығарды.

Сотталушы Қылмыстық кодекстің «Зорлау» және «Тұрғынжайға қолсұғылмаушылықты бұзу» баптары бойынша кінәлі деп танылды. Судья Дәурен Мадалиевтің шешімімен ол 15 жыл 6 айға бас бостандығынан айырылды. Жазасын қауіпсіздігі орташа түзеу мекемесінде өтейтін болады.

Іс жабық режимде қаралды. Сотталушы бұрын сотты болмаған және тағылған айыптарды мүлдем мойындамаған. Ол «бұл әрекетке қатысым жоқ» деген позицияны ұстанғанымен, жиналған дәлелдер оның кінәсін толық растады.

«Сот іс материалдарын зерттеп, сотталушының іс-әрекеттерінде қылмыстық құрам бар деген тұжырымға келді. Сіздің уәждеріңіз жәбірленушінің жауаптарымен және іске тіркелген бірнеше сот сараптама қорытындыларымен жоққа шығарылды», – деді судья Дәурен Мадалиев үкімді түсіндіру кезінде.

Сұмдық жағдай Түркістан облысы Келес ауданында болған. 15 жастағы мектеп оқушысының аяғы ауыр екенін жақындары жүктіліктің жетінші айында ғана білген. Қыз көршісі әрі туысқан атасынан зорлық көргені туралы ұзақ уақыт бойы ешкімге тіс жармаған.

Жасөспірім босанғаннан кейін ғана зорлық жасаған адамның кім екені нақты белгілі болды. Бұл хабар бүкіл ауылды дүр сілкіндіріп, тұрғындар күдіктінің отбасын ауылдан көшіп кетуін талап еткен еді.

Түрме жазасынан бөлек, сотталған зейнеткер педагогикалық лауазымдарда қызмет ету және кәмелетке толмағандармен жұмыс істеу құқығынан өмір бойына айырылды.