Түркістан облысында балаларға арналған оңалту орталығы ашылмақ

Түркістан облысы Сауран ауданына қарасты Ораңғай ауылында психоневрологиялық аурулары бар балаларға арналған 50 орындық жаңа оңалту орталығының құрылысы аяқталуға жақын. Нысан Қазақстан Республикасы Конституциясының 30 жылдығы қарсаңында ашылады.

Жалпы аумағы 9 мың шаршы метрді құрайтын және құны 3,2 млрд теңге болатын орталықта тұрғын бөлмелер, топтық және жеке оңалту сабақтарына арналған кабинеттер, емдік дене шынықтыру залы, психолог, психиатр, невролог, логопед бөлмелері, физиотерапия блогы мен асхана қарастырылған. Сонымен қатар мұнда 3 пен 18 жас аралығындағы тірек-қимыл аппараты бұзылған 50 бала ем қабылдайды. Жартылай стационардағы күндізгі бөлімге көршілес аудандардан тағы 30 бала қабылданбақ.

Мәжіліс депутаты, «AMANAT» партиясы фракциясының мүшесі Ерлан Әбдиев құрылыс барысымен танысып, ғимараттың ішкі жабдықталуын көрді. Орталықта әлеуметтік бейімдеу бөлмелері, сенсорлық құрал-жабдықтар, компьютерлік сынып, кітапхана, емдік дене шынықтыру залы, аквабөлме, Монтессори бөлмелері, акт және спорт залдары бар. Ерекше емдеу әдістерінің бірі ретінде Оңтүстік Кореядан әкелінген механикалық ат құрылғысы қолданылады. Ол әр екі минут сайын жаттығу формаларын ауыстырып, иппотерапияның 10 түрін жүзеге асыруға мүмкіндік береді.

– «Кедергісіз орта – бұл абстрактілі ұғым емес, адамдардың өмірін дәл қазір өзгертетін нақты шешімдер. Ораңғайдағы орталық – «AMANAT» партиясының сайлауалды уәделерінің орындалып жатқанын көрсетеді. Ерекше күтімді қажет ететін балалар үшін бұл – кәсіби көмекке жол, ал ата-аналары үшін – сенім мен қолдау. Біз мүмкіндігі шектеулі азаматтардың құқықтарын қорғауды жалғастырып, әрбір заң мен бағдарламада олардың мүддесін ескереміз», – деді Ерлан Әбдиев.

Қазір елімізде ерекше білім беруді қажет ететін 16,9 мың баланы қамтитын 1,8 мың инклюзия кабинеті, сондай-ақ 5,5 мың баланы қамтитын 688 бейімделген спорт секциясы жұмыс істейді. Өткен жылы Мәжілісте «Инклюзивті Парламент» тобының бастамасымен мүгедектігі бар азаматтардың құқықтарын қорғау бойынша бірқатар маңызды нормалар қабылданды. Соның ішінде I және II топтағы мүгедектігі бар адамдар мен мүмкіндігі шектеулі балалары бар отбасыларға баспана алу құқығын бірінші кезекте беру және жоғары оқу орындарына қабылдау квотасын 1%-дан 2%-ға арттыру бекітілді.