Түркістан облысында «Ауыл аманаты» бағдарламасы аясында 5 мыңға жуық жаңа жұмыс орны ашылды

Түркістан облысында Мемлекет басшысының тапсырмасына сәйкес тұрғындардың әл-ауқатын арттыру және ауылдық жерлерде кәсіпкерлікті дамытуға бағытталған «Ауыл аманаты» жобасы жүйелі түрде жүзеге асырылып келеді. Облыс әкімі Нұралхан Көшеровтің төрағалығымен өткен аппараттық мәжілісте бағдарламаның аралық нәтижелері мен алдағы міндеттері сараланды, деп хабарлайды Түркістан облысы әкімінің баспасөз қызметі.

2023–2025 жылдар аралығында аталған жобаны қаржыландыруға республикалық бюджеттен 30,2 миллиард теңге бөлініп, толық игерілді. Нәтижесінде 6 негізгі бағыт бойынша 4 223 жобаға жеңілдетілген несие берілді. Оның ішінде мал шаруашылығында – 3 155, өсімдік шаруашылығында – 597, кәсіпкерлікті бастау бағытында – 279, ауыл шаруашылығы кооперативтерін жабдықтауда – 150, сондай-ақ балық пен құс шаруашылығында ондаған жоба қаржыландырылды.

Облыс басшысы Нұралхан Көшеров бағдарламаның өңір экономикасын әртараптандырудағы маңызын атап өтіп, жауапты басқармаларға нақты міндеттер жүктеді:

«Ауыл аманаты» бағдарламасы бойынша жұмыс орындарын көбейтетін, экономиканы дамытуға нақты серпін беретін жобаларды іріктеп, соларды қолдауды жалғастыру керек. Екіншіден, ауыл шаруашылығы ғана емес, кәсіпкерлік, өндірісті дамытатын жобаларды енгізіп, қолдау көрсетіңіздер», – деді облыс әкімі.

Облыстық ауыл шаруашылығы басқармасының басшысы Әлібек Плаловтың баяндауынша, бағдарлама аясында өңірде 593 жылыжай кешені салынып, 79 қайта өңдеу кәсіпорны іске қосылды. Шағын субъектілер саны еселеп артып, 4 635 жаңа тұрақты жұмыс орны құрылды. Мал басы 76,8 мыңнан асып, атаулы әлеуметтік көмек алатын азаматтар саны 441 адамға азайды.

Биылғы жоспар мен өндірістік жобалар

Биыл бағдарламаны іске асыруға 15,3 миллиард теңге қарастырылған. Оның есебінен 1 115 жобаны қаржыландыру және 1 400 жаңа жұмыс орнын ашу межеленіп отыр. Қазіргі уақытта 7 миллиард теңге бөлініп, 73 ауылдық округ пен 78 өндірістік кооперативті құру жұмыстары жүргізілуде.

Бұдан бөлек, аудандарда мынадай өндірістік жобаларды іске қосу жоспарланған:

• Шардара ауданында: жылына 1,5 мың тонна балық жемін өндіретін кооператив;

• Сауран ауданында: жылдық қуаты 2 мың тонна макарон өнімдерін шығаратын кәсіпорын;

• Төлеби ауданында: жылына 360 тонна шұжық өнімдерін өндіретін қайта өңдеу цехы;

• Келес ауданында: тәулігіне 1,5 мың дана шұлық бұйымдарын шығаратын өндіріс орны.