Түркістан облысында 49 мектептің бюджетін талан-таражға салған шенеуніктер сотталды

Түркістан облысының Байдібек ауданында білім саласына бөлінген бюджет қаражатын жүйелі түрде талан-таражға салу фактісі бойынша сот процесі аяқталды. Қаржылық мониторинг агенттігінің облыстық департаменті жүргізген тергеу нәтижесінде, аудандық білім бөлімінің басшылары, бухгалтерлері мен экономистерін қамтитын 18 адамнан тұратын қылмыстық топтың әрекеті әшкереленді.

 Тергеу материалдарына сәйкес, бұл тұлғалар 49 жалпы білім беретін мектептің қаржысын иемденудің арнайы схемасын ұйымдастырған. Олар жалақы мен өзге де төлемдерге арналған бюджеттік өтінімдерді негізсіз ұлғайтып, электрондық жүйелерге әдейі жалған мәліметтер енгізіп отырған. Атап айтқанда, төлем ведомостарына іс жүзінде жұмыс істемеген адамдарды қосқан немесе қызметкерлердің жалақысы мен үстемеақыларын қолдан арттырған.

Заңсыз операцияларды бүркемелеу мақсатында қылмыстық топ қызметтік жазбалар, бұйрықтар мен жұмыс уақытының табельдерін қолдан жасап, құжаттардың бір бөлігін төлемдер жүргізілгеннен кейін кері күнмен рәсімдеген. Жымқырылған қаражат жалған тұлғалардың, соның ішінде күдіктілердің туыстары мен таныстарының банктік шоттарына аударылып, кейін алдын ала келісілген үлестер бойынша бөлініп келген. Бұл заңсыз әрекеттердің салдарынан мемлекетке келтірілген залал көлемі 583 миллион теңгеден асты. Айта кетерлігі, тергеу амалдары барысында күдіктілер келтірілген шығынды толық көлемде өтеген.

Сот шешімімен айыпталған 14 адам қылмыстық істің ауырлығына байланысты 3 жылдан 7 жылға дейінгі мерзімге бас бостандығынан айырылды. Ал қалған 4 тұлғаға қатысты іс рақымшылық туралы заңнамаға сәйкес тоқтатылды. Қазіргі уақытта сот үкімі заңды күшіне енді.