Түркістан облысы мен Өзбекстан арасындағы тауар айналымы 560 миллион долларға жетті

Түркістан облысының әкімі Нұралхан Көшеров Өзбекстан Республикасының Қазақстан Республикасындағы Төтенше және Өкілетті елшісі Бахтиер Ибрагимовпен ресми кездесу өткізді, деп хабарлайды Түркістан облысының әкімдігі. Кездесу барысында Түркістан облысы мен Өзбекстан Республикасы арасындағы стратегиялық әріптестікті нығайтуға бағытталған екіжақты ынтымақтастықтың өзекті мәселелері жан-жақты талқыланды. Тараптар сауда-экономикалық, инвестициялық, ауыл шаруашылығы, өнеркәсіп, мәдениет және туризм салаларындағы өзара іс-қимылды кеңейту, сондай-ақ бірлескен жобаларды жүзеге асыру мүмкіндіктерін қарастырды.

Аталған бағыттағы жұмыстар Қазақстан Республикасының Президенті Қасым-Жомарт Тоқаев пен Өзбекстан Республикасының Президенті Шавкат Мирзиёев арасындағы жоғары деңгейдегі келісімдер мен бастамалар аясында жүзеге асырылып келеді. Екі ел басшыларының өзара сенімі мен достық қарым-қатынасы өңіраралық ынтымақтастықтың дамуына тың серпін беріп отыр. Кездесуде өзара тауар айналымын арттыру, бірлескен өндіріс орындарын құру, өңіраралық байланысты нығайту және туристік әлеуетті бірлесе дамыту мәселелеріне ерекше назар аударылды.

Облыс әкімі Нұралхан Көшеров екі ел арасындағы әріптестіктің маңыздылығына тоқталып, Түркістан облысы мен Өзбекстанның шекаралас өңірлері тарихи, мәдени және экономикалық тұрғыдан тығыз байланыста екенін атап өтті. Өңір басшысы былтыр Мемлекет басшысы Қасым-Жомарт Тоқаев қол қойған «Түркістан қаласының ерекше мәртебесі туралы» Заңның маңызын тілге тиек етіп, бұл құжат өңірдің дамуына жаңа серпін бергенін жеткізді. Қазіргі таңда екі ел Президенттері бекіткен «Орталық Азия» халықаралық өнеркәсіптік кооперация орталығын құру жөніндегі Жол картасы аясында жүйелі жұмыстар жүргізілуде.

Басқосуда Түркістан облысының экономикалық және инвестициялық әлеуеті кеңінен таныстырылды. Бүгінде облыс ауыл шаруашылығы өнімдерін өндіру бойынша республикада көш бастап тұр. Сонымен қатар аймақ ет өнеркәсібінде жетекші рөл атқарып, Қазақстан бойынша ірі қара еті экспортының 80 пайызын және ұсақ мал еті экспортының 75 пайызын қамтамасыз етеді. Өңірде инвесторлар үшін қолайлы ахуал қалыптасқан, қазіргі таңда 21 индустриялық аймақ және «Turan» арнайы экономикалық аймағы жұмыс істейді. Бұл алаңдарда инвесторлар үшін салықтық жеңілдіктер мен жобаларды тиімді іске асыруға қажетті барлық инфрақұрылымдық мүмкіндіктер қарастырылған.

Өз кезегінде Өзбекстан Республикасының Төтенше және Өкілетті елшісі Бахтиер Ибрагимов Түркістан облысының әлеуетін жоғары бағалап, қос ел арасындағы серіктестік қарым-қатынасты нығайтуға күш салатынын жеткізді. Елші мырза өзбекстандық кәсіпкерлер мен инвесторларды осы өңірге бағыттау жұмыстары жүйелі жүріп жатқанын, әсіресе туризм мен кәсіпкерлікті дамыту маңызды бағыттардың бірі екенін атап өтті. Тарихи-мәдени байланыстар ескеріле отырып, Түркістан қаласының туристік инфрақұрылымын бірлесе дамыту мәселесі қолдау тапты.

Түркістан облысы үшін инвестиция тарту - басым бағыттардың бірі. 2025 жылдың қорытындысы бойынша Түркістан облысы мен Өзбекстан Республикасы арасындағы тауар айналымы 560 млн АҚШ долларын құрады, оның ішінде экспорт үлесі - 409,5 млн, ал импорт - 150,5 млн АҚШ долларына тең болды. Сондай-ақ Өзбекстаннан тартылған тікелей инвестициялар көлемі 292,8 млн АҚШ долларына жеткен. Қазіргі таңда аймақта мақта-тоқыма кластерін құру, ірі ет өңдеу кешенін салу, Сауран ауданында заманауи суару жүйелерін өндіретін зауыт ашу және балық шаруашылығын дамыту жобалары кезең-кезеңімен сәтті жүзеге асырылып жатыр. Кездесу қорытындысы бойынша тараптар стратегиялық әріптестікті одан әрі нығайтуға және өзара тиімді жобаларды бірлесіп іске асыруға уағдаласты.