Түркі мемлекеттері ұйымы әскери альянсқа айнала ма: Тоқаев өз ұстанымын білдірді

Қазақстан Президенті Қасым-Жомарт Тоқаев Түркі мемлекеттері ұйымының (ТМҰ) басқосуында ұйымды әскери альянс ретінде сипаттайтын ой-пікірлерді үзілді-кесілді жоққа шығарды, деп хабарлайды Ақорданың баспасөз қызметі.

Мемлекет басшысы өз сөзінде бұл құрылымның геосаяси жоба немесе әскери ұйым еместігін, керісінше, бауырлас елдердің жан-жақты ынтымақтастығын нығайтатын бірегей алаң екенін атап өтті.

Президенттің мәлімдеуінше, соңғы уақытта ұйымды әскери форматта көрсетуге тырысушылардың теріс пейілі мен мақсаты анық сезіліп отыр. Ол жаңа форматтағы кез келген жұмыс ТМҰ-ның негізгі мақсат-міндеттеріне сай болуы тиістігін және Қазақстан үшін түркі әлемінің бірлігін нығайту кезек күттірмейтін басымдық екенін жеткізді. Осы орайда Тоқаев ұйымның тек сауда-экономикалық, жоғары технологиялық, цифрлық және мәдени-гуманитарлық байланыстарды дамытуға бағытталғанын алға тартты.

Қасым-Жомарт Тоқаев «Алтау ала болса, ауыздағы кетеді, төртеу түгел болса, төбедегі келеді» деген аталы сөзді мысалға келтіре отырып, түркі әлемінің әрдайым тату болуы ұлттық мүдде тұрғысынан тиімді екенін ескертті. Ол бұл басқосу тамыры бір, тарихы ортақ елдердің ауызбіршілігін арттыра түсетініне сенім білдірді.