Туризм және Спорт министрі Черчесов туралы пікірін айтты

Оның айтуынша, Станислав Черчесовтің «француз тіліне» қатысты қалжыңы орынсыз екенін Қазақстан футбол федерациясы мен бапкер жақсы түсінеді. Алайда Бас бапкердің міндеті ұлттық құраманы жаңа деңгейге шығару. Сондықтан оған кәсби қызметіне қарап беруге шақыратынын айтты.

“Біз қашаннан қонақжай, дархан мінезді, кешірімді елміз. Бізді мықты ел ететін де осы қасиеттер. Сондықтан мәселені одан әрі өршіте бермей, халқымызға тән кеңпейілдік танытқанымыз абзал.

 
Кез келген даулы мәселені ақыл-парасатпен шешетін толерантты, өркениетті, яғни дана қоғам екенімізді көрсете білейік.

 
Станислав Черчесов – халықаралық деңгейдегі танымал футболист әрі 20 жылдық тәжірибесі бар кәсіби жаттықтырушы. Сондықтан ол түбінде қазақстандық жанкүйерлердің сенімін ақтап, ұлттық құраманы қазіргі күрделі кезеңнен абыроймен алып шығады деп сенемін”,- деді Туризм және Спорт министрі Ербол Мырзабосынов.