Туристер енді алданып қалмайды: Астана әуежайында жаңа такси қызметі іске қосылды

Енді елордаға келген жолаушылар такси қызметін делдалсыз, қауіпсіз әрі жылдам пайдалана алады. Астана қаласы әкімдігінің ресми сайтының хабарлауынша, әуежайда Taxi Point деп аталатын жаңа такси жүйесі іске қосылды.

Жобаны Astana Tourism туризмді дамыту орталығы жеке инвесторлармен бірлесіп жүзеге асырған. Оның мақсаты – туристер мен жолаушыларға жайлы жағдай жасау және такси қызметінің қолжетімділігін арттыру.

Taxi Point қызметі әуежайдың ұшу-қону аймағына орнатылған арнайы терминалдар арқылы жүзеге асады. Терминалдан:

• баратын бағытыңызды таңдауға,

• банк картасы арқылы төлем жасауға,

• такси туралы барлық ақпаратты алуға болады:
  – көліктің келу уақыты,
  – маркасы мен түсі,
  – нөмірі,
  – жүргізушінің байланыс нөмірі.

Сервис жеті тілде жұмыс істейді: қазақ, орыс, ағылшын, қытай, испан, француз және түрік тілдерінде.