Цифрлық трансформацияға дер кезінде бет бұрған елдер көш соңында қалмайды - Тоқаев

 Мемлекет басшысы Қасым-Жомарт Тоқаев Түркі мемлекеттері ұйымының бейресми саммитінде сөз сөйледі. Жаһандық технологиялық бәсекелестік белең алған кезеңде инновациялық дамудың ел қауіпсіздігі мен тұрақтылығы үшін шешуші факторға айналғанына тоқталды. Осы орайда Президент:

«Қазір бүкіл әлем бұрын-соңды болмаған өзгерістермен бетпе-бет келді. Жаңа сын-қатерлер пайда болды. Дүние жүзінде технологиялық бәсеке күшейді, яғни, инновациялық тұрғыдан озық ел болу мақсаты алдыңғы қатарға шықты. Технологиялық даму кез келген мемлекеттегі тұрақтылық пен қауіпсіздік факторына айналды. Бұл – цифрлық трансформацияға дер кезінде бет бұрған елдер көш соңында қалмайды деген сөз. Сондықтан Түркі кеңесіне мүше мемлекеттер технологиялық жаңғыру үдерісінен тыс қалмауы үшін бірлесе жұмыс істеуі керек деп санаймыз. Жасанды интеллект пен цифрландыру үдерісі түркі әлемінің дамуына жол ашуға тиіс», — деп мәлімдеді.

Бұл үндеу түркі тілдес мемлекеттердің технологиялық интеграциясын тереңдетуге және ортақ цифрлық экожүйе құруға бағытталған маңызды қадам болып табылады. Түркі әлемінің жаһандық прогрестен қалыс қалмауы үшін жасанды интеллект мүмкіндіктерін тиімді пайдалану — басты басымдық ретінде айқындалды.