Цифрлық көшбасшы: «Астана Тазалық» халықаралық деңгейде тәжірибе бөлісуде

Астана қаласының коммуналдық қызмет көрсету саласындағы озық технологиялары енді халықаралық деңгейде сұранысқа ие. «Астана Тазалық» ЖШС енгізген цифрлық жүйелер Бішкек қаласының тазалық жұмыстарын жаңғыртуға негіз болмақ.

Елордаға Қырғыз Республикасының Бішкек қаласынан арнайы делегация келіп, «Астана Тазалық» кәсіпорынының жұмысымен танысты. Сапардың басты мақсаты — қала тазалығын сақтаудағы цифрлық шешімдерді зерттеп, оны көршілес елдің инфрақұрылымына енгізу.

Бішкек қалалық «Тазалық» муниципалды кәсіпорны директорының орынбасары Бааркан Иманакунова Астананың тәжірибесіне жоғары баға берді:

«Біздің мақсатымыз — Астананың цифрлық жүйедегі жаңашылдықтарын үйреніп, өзімізде іске асыру. Жүргізушілерді жол оқиғаларынан сақтау, онлайн бақылау және реагенттерді қолдану жүйесі бізді қатты қызықтырды. Астана бұл бағытта өте бай тәжірибе жинақтаған», — деді ол.

Кәсіпорынның басты мақтанышы — электронды жол парағы. Бұл жүйе бүгінде 393 арнайы техникаға енгізілген. Оның берген нәтижелері таңғалдырарлық.
Мәселен, жол парағын рәсімдеу уақыты 10 минуттан 1 минутқа дейін қысқарды. Сонымен қатар, медициналық тексеруде адам факторы жойылып, техниканы желіге шығару қауіпсіздігі артты.

Сондай-ақ, цифрландыру тек қағазбастылықты жойып қана қоймай, қызметкерлердің қауіпсіздігін де нығайтты.
Атап айтқанда, Med365 және Adal Check жүйесі арқылы медициналық тексеру онлайн режимге ауысып, адам факторы толықтай жойылды. Ал шаршауды анықтау мақсатында техникаға орнатылған камералар жүргізушінің күйін бақылап, шаршау белгілері немесе маршруттан ауытқу байқалса, бірден ескерту жасайды.

«Астана Тазалық» ЖШС-нің бас директоры Замир Сағыновтың айтуынша, цифрландыру — бұл жай ғана бақылау емес, бұл ресурстарды ұтымды пайдаланудың басты құралы.

«Цифрлық шешімдер процестердің ашықтығын арттырып, қалалық инфракұрылымның тұрақты жұмысын қамтамасыз етеді», - деп атап өтті кәсіпорын басшысы.

Бұл жүйеге тек шетелдіктер ғана емес, еліміздің басқа өңірлері де қызығушылық танытуда. Мәселен, Алматы қаласы мен «ҚажСервис» мекемесі бұл технологияларды енгізуді бастап кеткен.