Цифрлық имам: Мүфтият жасанды интеллект көмегіне жүгінбек

Астана қаласында Қазақстан мұсылмандары діни басқармасының (ҚМДБ) ұйымдастыруымен өткен жиында діни-ағарту саласына серпін беретін «Imam AI» жаңа цифрлық жобасы таныстырылды.

ҚМДБ-ның Цифрлық даму бөлімінің меңгерушісі Тимур Серікқанұлының айтуынша, жасанды интеллект негізіндегі бұл жоба сенушілерге діни ақпаратты жедел әрі қолжетімді түрде жеткізуге бағытталған. «Imam AI» жүйесі діни сұрақтарға жауап беру, ағартушылық бағыттағы мәліметтерді өңдеу және халықпен кері байланысты нығайту үшін пайдаланылмақ.

Жиын барысында жобаны жүзеге асырудың кезеңдері жан-жақты талқыланды. Жоспарға сәйкес, жаңа жүйе осы жылдың мамыр айының басында пилоттық режимде жұмысын бастайды.

Бас мүфти Наурызбай қажы Тағанұлы діни саладағы цифрландыру үдерісінің маңыздылығына тоқталып, жауапты бөлімдерге жобаны сапалы әрі тиімді іске асыруды тапсырды. Ол заман талабына сай технологияларды пайдалану ақпараттық-насихат жұмыстарын жаңа деңгейге көтеретінін атап өтті.