АҚШ президенті Дональд Трамп Израиль мен Иран арасында атысты толық тоқтату туралы келісімге қол жеткізілгенін мәлімдегенімен, екі ел де 24 маусым таңына дейін әскери әрекеттерін жалғастырды.
Иранның зымыран соққылары салдарынан Израильдің оңтүстігіндегі Беэр-Шева қаласында 7 адам қаза тауып, тағы 10-нан астам адам жараланды. Бұл туралы Израильдің ұлттық медициналық қызметі хабарлады. Ел бойынша әуе дабылы іске қосылып, Иран мемлекеттік телеарнасы Израильге жаңа зымырандардың атылғанын жариялады.
Израиль жауабы мен Трамптың мәлімдемесі
Израильдің әскери дереккөздеріне сүйенген dpa агенттігі Израиль әскери-әуе күштері Иранның батысындағы зымыран қондырғыларын жойғанын хабарлады. Бұл операция Трамптың Truth Social желісінде жариялаған атысты тоқтату режимі күшіне енбей тұрып жүргізілген.
Израиль билігі Трамптың мәлімдемесіне түсініктеме бермеді. Израиль армиясы Тегерандағы бірнеше аудан тұрғындарына эвакуация жайлы екі ескерту жасады. Артқы тыл басшылығы қауіпсіздік шаралары әлсіретілмейтінін мәлімдеді.
Иран Трамптың сөзін жоққа шығарды
Иран Сыртқы істер министрі Аббас Арагчи Трамптың атысты тоқтату туралы сөзін жоққа шығарды. Ол X әлеуметтік желісінде Иран шабуылдарын тоқтатуға дайын екенін, бірақ бұл үшін Израиль де таңғы 4-ке дейін әскери әрекеттерін доғару керектігін мәлімдеді.
Арагчи Иран армиясы соғыс қимылдарын таңғы 4-ке дейін жүргізгенін айтты. Кейбір бақылаушылар бұл мәлімдемені атысты тоқтату шешімі ретінде қабылдады.
АҚШ пен Иран арасындағы соққы алмасу
22 маусымға қараған түні АҚШ Ирандағы ядролық нысандарға соққы беріп, қақтығысқа тікелей араласты. АҚШ бомбалаушы ұшақтары Фордо және Натанз нысандарына 15-тен астам қуатты бомбалар тастады, сондай-ақ сүңгуір қайықтардан Исфахан мен Натанзға 30 "Томагавк" зымыраны атылды.
Трамп бұл шабуылдарды Иранның ядролық бағдарламасын тоқтату үшін жасалған шешуші қадам деп атады.
Израильдің әскери операциясы
13 маусымда Израиль Иранға қарсы әскери операцияны бастап, оның ядролық нысандарына, әскери базаларына және әскерлеріне соққы жасады. Тегеран ядролық қару жасап жатқаны туралы айыптауларды жоққа шығарып, жауап ретінде Израильге жүздеген дрон мен баллистикалық зымыран атқан. Содан бері қос тарап арасында қарулы қақтығыс жалғасып жатыр.
