Трамп Қытайдан басқа барлық елге баж салығын 10%-ға түсірді

АҚШ президенті Дональд Трамп барлық ел үшін үш айға баж салығын төмендетіп, Қытай үшін керісінше — 125%-ға дейін көтерілетінін мәлімдеді. Бұл туралы ол Truth Social желісіндегі парақшасында жазды.

Трамптың айтуынша, 75-тен астам мемлекет АҚШ-пен жаңа сауда шарттары бойынша келіссөз жүргізуге дайын екенін білдірген. Осыны ескере отырып, АҚШ президенті барлық елдер үшін 90 күндік үзіліс жариялап, бұл аралықта өзара баж салығының мөлшерін 10% деңгейінде белгіледі. Жеңілдетілген мөлшерлеме бірден күшіне енеді.

“Бұл елдер АҚШ-қа қарсы ешқандай қарсы шара қабылдамағандықтан, мен 90 күндік үзіліс енгізіп, өзара тарифті 10% деңгейінде белгілеп отырмын”, – деді Трамп.

Алайда Қытайға қатысты АҚШ президенті тарифті 125% деңгейіне дейін күрт өсіретінін мәлімдеді.

“Қытайдың әлемдік нарықтарға деген құрметсіздігіне байланысты, мен АҚШ тарапынан Қытайға салынатын тарифті 125%-ға дейін көтеремін. Бұл шешім дереу күшіне енеді. Бір сәтте, үміттенемін, жақын арада, Қытай АҚШ пен басқа елдерді тонау дәуірі аяқталғанын түсінеді”, – делінген Трамп мәлімдемесінде.

АҚШ қаржы министрі Скотт Бессенттің айтуынша, Қытайдан басқа елдер тарифтерді 10% деңгейінде төлей береді, бұл кезеңде тараптар келіссөздер жүргізетін болады. Алайда жеңілдік салаға байланысты тарифтерге әсер етпейді.