Трамп Қазақстан тауарларына жаңа баж салығын бекітті

Президент Дональд Трамп қол қойған жарлыққа сәйкес, 69 ел мен аумақтан, соның ішінде Еуроодақтан келетін импортқа жаңа баж салықтары бекітілді. Жаңа тарифтер 7 тамыздан бастап күшіне енеді. Бұл туралы CNN телеарнасы хабарлады.

АҚШ-тың кеден және шекара қызметіне жаңа тәртіпке сәйкес тиісті техникалық өзгерістер енгізу үшін бір апта уақыт берілген.

CNN мәліметінше, "әмбебап" 10 пайыздық базалық тариф тек АҚШ-тың оң сауда балансы бар елдеріне ғана қолданылмақ. Ал сауда тапшылығы тіркелген шамамен 40 мемлекетке ең төменгі тариф – 15% деңгейінде белгіленеді.

Алайда Қазақстан бұл тізімге кірмейді. Елге 25 пайыз көлеміндегі жоғары тариф бекітілген. Бұл шешім Трамп әкімшілігінің биыл сәуір айында жариялаған сауда саясатының жалғасы болып отыр.

Сондай-ақ АҚШ басқа елдер арқылы тауарларды тасымалдап, тарифтерден жалтаруға жол бермеу мақсатында транзиттік жеткізілімдерге 40 пайыздық айыппұл салмақ. Бұл санкциялар да 7 тамыздан бастап күшіне енеді.

Тізімде Қытай жоқ, себебі АҚШ бұл елмен жеке келіссөздер жүргізіп жатыр. Ал Канада үшін USMCA еркін сауда келісіміне кірмейтін тауарларға тариф 25%-дан 35%-ға дейін көтерілді.