Трамп: Хаменеи қаза тапты

АҚШ президенті Дональд Трамп Иранның рухани көсемі аятолла Әли Хаменеи қаза тапқанын мәлімдеді. Ол бұл туралы өзінің әлеуметтік желідегі парақшасында жазды.

Трамп жазбасында Хаменеиді «тарихтағы ең зұлым адамдардың бірі» деп атап, оның өлімі «Иран халқы үшін ғана емес, Америка және әлем елдері үшін әділет» екенін айтты. Президенттің сөзінше, операция АҚШ барлау қызметтері мен Израильмен тығыз ынтымақтастық нәтижесінде жүзеге асқан.

«Ол біздің барлау және жоғары технологиялық бақылау жүйелерімізден жасырына алмады», – деп жазды Трамп.

АҚШ басшысы ауыр әрі дәл бағытталған соққылар жалғасатынын мәлімдеп, олардың мақсаты Таяу Шығыста және әлемде бейбітшілік орнату екенін атап өтті.

Әзірге Иран билігі Хаменеидің қаза тапқаны туралы ақпаратқа ресми түсініктеме берген жоқ.

Аймақтағы жағдай бұған дейін АҚШ пен Израильдің Иранға жасаған соққыларынан кейін күрт шиеленіскен болатын. Таяу Шығыстағы бірнеше елде жарылыстар болды.