Toyota Alphard пен өзге де оң рөлді көліктерге қалааралық жолаушы тасымалына тыйым салынбақ

Қазақстанда жол-көлік оқиғаларының санын қысқарту үшін Көлік министрлігі мен Ішкі істер министрлігі бірлесіп жаңа шаралар пакетін дайындап жатыр. Соның аясында рөлі оң жақта орналасқан көліктерге, оның ішінде Toyota Alphard секілді үлгілерге такси сервистері арқылы қалааралық жолаушы тасымалдауға шектеу қою көзделіп отыр. Бұл туралы Astana TV хабарлады.

Мәжіліс депутаты Ерлан Саировтың айтуынша, бастаманың негізгі мақсаты – жолдағы қауіпсіздікті арттырып, азаматтардың өмірін қорғау. Дегенмен ол талаптарды қатаңдату такси жүргізушілерінің жаппай табысынан айырылуына әкелмеуі тиіс екенін атап өтті. Қазіргі таңда жүргізушілерге қандай балама ұсынылатыны нақты айтылған жоқ.

Ал автоэксперт әрі қоғам белсендісі Еркебұлан Құлбасов бұл мәселе бұған дейін де бірнеше рет көтерілгенін жеткізді. Оның сөзінше, тұрғындар тарапынан түрлі ұсыныстар айтылып, ымыраға келудің бірнеше жолы қарастырылып жатыр.

«Оң жақ рөлді көліктерге қатысты бұрын да пікір білдіргенбіз. Қазіргі кездесу – Көлік министрлігімен бірлескен жұмыстың нәтижесі деп ойлаймын. Қауіпсіздік сақталып, сонымен қатар адамдар табыс көзінен айырылмайтын теңгерімді шешім қабылданады деген үміт бар», – деді ол.