Төреғали Төреәлі Дастан Сәтбаевқа арналған жаңа әнін таныстырды

Алматының Орталық стадионында өткен «Қайрат» пен «Қызылжар» арасындағы матч барысында ерекше оқиға орын алды. Кездесудің үзілісінде танымал әнші Төреғали Төреәлі қазақ футболының жас жұлдызы Дастан Сәтбаевқа арнаған жаңа әнін көпшілікке алғаш рет ұсынды.

Жаңа туындының тұсаукесері жасыл алаңның дәл ортасында өтті. Мыңдаған жанкүйер жиналған стадионда шырқалған ән көрермендердің ыстық ықыласына бөленді. Ән мәтінінде Алматы қаласы, «Қайрат» футбол клубы және Дастан Сәтбаевтың футболдағы жолы мен болашағына қатысты әсерлі жолдар орын алған.

Төреғали Төреәлі орындаған әнде:

«Алтын күн аспаны, алтын дән даласы,
Айбыныңды асырған Алматы қаласы.
Қайраттың Дастаны, қазақтың баласы…»

деген жолдар шырқалып, жанкүйерлер тарапынан зор қолдауға ие болды.

Сонымен қатар әнші «Қайрат» жанкүйерлерінің сүйікті әндерінің біріне айналған «Алматы – ең алғашқы махаббатым» туындысын да орындап, стадиондағы ерекше атмосфераны одан әрі қыздыра түсті.

Айта кетейік, 17 маусым күні Алматыда Дастан Сәтбаевтың Англияның «Челси» клубына аттануы қарсаңында арнайы қоштасу рәсімі ұйымдастырылған болатын. Қазақстандық жанкүйерлер жас футболшыға сәттілік тілеп, оның халықаралық аренада ел намысын абыроймен қорғайтынына сенім білдірді.