Топ-клубтардың елімізге келуі қиындайды: Чемпиондар лигасының жаңа форматы талқыланып жатыр

УЕФА мен Суперлига 2027 жылдан бастап Чемпиондар лигасының форматын түбегейлі өзгертуді жоспарлап отыр. Қазір бұл бастама бойынша талқылаулар сегіз айдан бері жүріп жатыр, деп хабарлады COPE.

Жаңа жүйе қабылданса, турнир атауы өзгермейді. Champions League атауы сақталады, алайда жарыс мүлде басқа форматта өтеді.

Жаңа форматтың негізгі тармақтары:

• – Чемпиондар лигасына 36 команда қатысады.

• – Командалар екі бөлек топқа (подгруппаға) бөлінеді:

  • 1-топ: УЕФА рейтингінде ең жоғары тұрған 18 клуб;

  • 2-топ: Қалған 18 команда.

• – Әр команда 8 матч өткізеді:

  • 4 ойын – өз алаңында;

  • 4 ойын – сырт алаңда.

• – Матчтар тек өз тобының қарсыластары арасында өтеді.

• – Ұлттық чемпионаттар мен УЕФА коэффициенттері жүйесі сақталады.

• – 1-топтың үздік 8 клубы бірден 1/8 финалға шығады.

• – Қалған командалар (соның ішінде 2-топтағы клубтар) 1/16 финалдық іріктеу арқылы келесі кезеңге өтуі мүмкін, бұл жүйе әлі талқыланып жатыр.

Жаңа формат бойынша “Қайрат” осы маусымда кімдермен ойнар еді?

1-топ: «Реал», «Манчестер Сити», «Бавария», «Ливерпуль», ПСЖ, «Интер», «Челси», «Боруссия Д», «Барселона», «Арсенал», «Байер», «Атлетико», «Бенфика», «Аталанта», «Вильярреал», «Ювентус», ПСВ және «Наполи».

2-топ: «Айнтрахт», «Брюгге», «Тоттенхэм», «Аякс», «Спортинг», «Олимпиакос», «Славия» (Прага), «Будё-Глимт», «Марсель», «Копенгаген», «Монако», «Галатасарай», «Қайрат», «Унион», «Пафос», «Атлетик», «Ньюкасл» және «Қарабақ».

Футболдың “Netflix”-і

УЕФА матчтарды тарату жүйесін де өзгертуді көздеп отыр. Ұйым бұрынғыдай телеарналарға трансляция құқығын сатпай, өздерінің жеке онлайн-платформасын іске қосуы мүмкін.

Бұл платформа Netflix сияқты жұмыс істеп, Чемпиондар лигасының ойындарын көрерменге тікелей көрсетпек. Матчтардың ақылы не тегін көрсетілетіні әзірге белгісіз.

Жаңа тәсілдің арқасында клубтар табысын көбейтіп, ал жанкүйерлер ойындарды бұрынғыдан арзанырақ, тіпті тегін көру мүмкіндігіне ие болуы ықтимал.