Тоқаевтың Нью-Йоркке жұмыс сапары басталды

ҚР Президенті Қасым-Жомарт Тоқаев БҰҰ Бас Ассамблеясының мерейтойлық 80-сессиясына қатысу үшін Нью-Йоркке барды. Сапар аясында Мемлекет басшысы Жалпы дебатта сөз сөйлеп, бірқатар мемлекет басшыларымен және халықаралық ұйым жетекшілерімен кездеседі. Сонымен бірге трансұлттық компаниялардың өкілдерімен келіссөздер өткізіп, Қазақстанның инвестициялық мүмкіндіктерін таныстыру жоспарланған.

🔹 Cameco корпорациясымен кездесу

Сапар канадалық Cameco компаниясының президенті Тим Гитцельмен кездесуден басталды. Тараптар уран өндірісіндегі ынтымақтастықты талқылады. Президент Тоқаев Cameco-ның «Қазатомөнеркәсіптің» сенімді серіктесі екенін атап өтіп, Қазақстанда 500 млн доллардан астам инвестиция құйғанын және технология трансферіне үлес қосқанын айтты. Сондай-ақ Қазақстан үш атом электр стансасын салуды көздеп отырғанын жеткізді.

🔹 Goldman Sachs өкілдерімен келіссөз

Тоқаев Goldman Sachs Global Institute компаниясының президенті Джаред Коэнмен жүздесті. Президент Қазақстанның толық цифрлық мемлекетке айналу жоспары аясында жасанды интеллект пен қаржы экожүйесін цифрландыруға қызығушылық білдірді. Ал Джаред Коэн банк әзірлеп жатқан Digital Asset Platform тәжірибесімен бөлісті.

🔹 ETS компаниясымен ынтымақтастық

Мемлекет басшысы ETS компаниясының президенті Амит Севакпен кездесті. Әңгіме барысында білімді бағалау мен тестілеу саласындағы серіктестік жайы сөз болды. Президент Қазақстанның білім беру жүйесінде ETS тәжірибесін қолдануға мүдделі екенін айтты.

🔹 Смитсон институтымен мәдени байланыс

Қасым-Жомарт Тоқаев Смитсон орталығының директоры Халле Батвинмен жүздесіп, АҚШ-та қазақ мәдениетін дәріптеп жүргені үшін алғыс білдірді. Президент мәдени дипломатия Қазақстан мен АҚШ қарым-қатынасын жаңа деңгейге көтеретініне сенім артты.

ℹ️ Смитсон институты – әлемдегі ең ірі мәдени, ғылыми және білім беру кешендерінің бірі. Оның құрамына 21 музей мен галерея, 14 ғылыми орталық, кітапханалар мен ұлттық зообақтар кіреді.

📌 Президенттің сапары барысында Қазақстанның халықаралық бастамалары мен инвестициялық әлеуетін кеңінен таныстыру жалғасады.