Тоқаевқа қаржылық қылмыстар бойынша есеп берілді: Миллиардтаған жымқырулардың беті ашылды

Президент Қасым-Жомарт Тоқаев Қаржылық мониторинг агенттігінің төрағасы Жанат Элимановты қабылдады. Мемлекет басшысына агенттіктің 2026 жылдың алғашқы жартыжылдығында атқарған жұмысы туралы есеп берілді.

Жанат Элимановтың айтуынша, осы кезеңде 496 қылмыстық іс бойынша тергеу аяқталып, жәбірленушілерге 22,6 млрд теңге өтелген. Сондай-ақ 7 қылмыстық топтың, оның ішінде төрт трансұлттық топтың қызметі тоқтатылған. Бұдан бөлек, 176 млрд теңгеден астам қаражатты заңсыз қолма-қол ақшаға айналдырған 44 желі әшкереленген.

Агенттік есірткі саудасы мен алаяқтықтан түскен табысты жылыстатуға пайдаланылған 12 астыртын криптоайырбастау орнын жойған. Өз есепшоттары арқылы 113 млрд теңге өткізген 36 дропперлік топ анықталған.

Жанат Элиманов ТМД елдері аумағында алғаш рет ұялы байланыс операторларының жұмысын қайталайтын және фишинг SMS-хабарламаларды жаппай таратуға арналған арнайы құрылғыны пайдаланған адамдар ұсталғанын да баяндады.

Бюджет шығыстарына жүргізілген бақылау барысында 52 инфрақұрылымдық жоба бойынша 279 млрд теңгенің негізсіз жұмсалуына жол берілмеген. Ғылыми әзірлемелерді коммерцияландыру кезінде 10 млрд теңге көлеміндегі мемлекет қаржысын жымқыру қаупі анықталған.

Сондай-ақ жеке клиникалардың Міндетті әлеуметтік медициналық сақтандыру қорынан заңсыз қаражат алу үшін 140 мың азаматтың жалған тіркеу деректерін көрсеткені белгілі болды.

Алдын алу шаралары аясында заңсыз ойын бизнесінің белгілері бар 9 мың сайт пен есептік жазба бұғатталған. Алаяқтық мақсатында ашылған 2,3 мың интернет-ресурс пен 35 мыңнан астам мүшесі бар 25 чаттың жұмысы тоқтатылған.

Кездесу соңында Мемлекет басшысы Қаржылық мониторинг агенттігі жұмысының негізгі бағыттары бойынша бірқатар нақты тапсырма берді.