Тоқаев: «Жеке абыройымды ойласам, мен де бұл жұмысты келесі ұрпаққа ысыра салар едім»

Мемлекет басшысы Қасым-Жомарт Тоқаев энергетика және тұрғын үй-коммуналдық шаруашылық саласындағы реформалар неге дәл қазір басталғанын түсіндірді. Бұл туралы Президент «Turkistan» газетіне берген сұхбатында айтты.

Президенттің айтуынша, Үкімет энергетикалық және коммуналдық нысандарды жаппай жаңғыртуға кіріскен. Қазіргі таңда жүздеген шақырым инженерлік желілер мен электр қуатын тарататын инфрақұрылымды салу және жаңарту бойынша ауқымды жобалардың есеп-қисабы әзірленіп жатыр.

«Қазірдің өзінде қауіпті “қызыл” аймақта тұрған жылу электр станцияларының саны 19-дан 10-ға дейін азайды. Қабылданған шаралардың нәтижесі көріне бастады, нысандардың апаттық жағдайға тап болу қаупі сейіліп келеді», – деді Қасым-Жомарт Тоқаев.

Сонымен бірге Мемлекет басшысы тек тозған инфрақұрылымды жөндеу жеткіліксіз екенін атап өтті. Оның сөзінше, басты мәселе – саланың жұмыс тәсілін түбегейлі өзгертіп, инвестиция тартуға мүмкіндік беретін нақты нарықтық тетіктерді қалыптастыру.

«Әбден тозып, әупіріммен әрең тұрған инфрақұрылымды қалпына келтіру жеткіліксіз, жұмыс тәсілін өзгерту керек», – деді Президент.

Қасым-Жомарт Тоқаев энергетика мен тұрғын үй-коммуналдық шаруашылығы мемлекеттің өмір сүруіне тікелей әсер ететін негізгі тірек екенін айтты. Оның сөзінше, бұл салаларға ондаған жыл бойы жеткілікті көңіл бөлінбеген.

«Энергетика және коммуналдық шаруашылық – кез келген мемлекеттің тұғыры. Бұл негіз шайқалса, басқасы түгел күйрейді», – деді Мемлекет басшысы.

Президент арзан тарифтер мен төмен бағалар қоғамда қалыптасқан қате түсініктің салдары екенін де ашық айтты. Оның айтуынша, электр қуатының, жанар-жағармайдың және коммуналдық қызметтердің жасанды түрде арзандатылуы қарапайым халыққа емес, ірі кәсіпорындар мен ауқатты топтарға тиімді болған.

«Электр қуатының арзандығы көп балалы отбасыларға емес, ірі кәсіпорындарға тиімді болды. Ал арзан жанар-жағармайдың қызығын студенттер мен зейнеткерлер емес, билікке жақын жүрген кәсіпкерлер көрді», – деді Қасым-Жомарт Тоқаев.

Осыған байланысты Мемлекет басшысы тарифтердің төмен болуы әлеуметтік әділдік емес, жасырын субсидия екенін атап өтті.

«Тарифтің төмен болуы қарапайым адамдарға пайдалы деген жалған сенімнен арылатын уақыт жетті. Іс жүзінде бұл – ауқатты азаматтарға жасырын түрде берілетін субсидия», – деді Президент.

Қасым-Жомарт Тоқаев тариф саясатын өзгерту шешімі оңай болмағанын да жасырмады.

«Шынымды айтайын, жеке абыройымды ойласам, мен де бұл жұмысты келесі басшылыққа ысыра салар едім. Бірақ мен үшін қағаз жүзіндегі емес, іс жүзіндегі нақты нәтиже бәрінен де маңызды», – деді ол.

Президенттің айтуынша, әлеуметтік әділдікті қалпына келтіру үшін «кім қанша тұтынса, сонша төлейді» қағидатын орнықтыру қажет. Ал мемлекет көмекті тек шын мәнінде мұқтаж азаматтарға атаулы түрде көрсетуі тиіс.

Қазіргі таңда сараланған төлем жүйесі енгізіліп, су мен электр энергиясын үнемдеп пайдаланатын тұрғындар ең төмен тарифпен төлеу мүмкіндігіне ие болған. Мемлекет басшысы бұл қадам ел ресурстарын әділ бөлетін жаңа жүйе құруға жол ашатынын атап өтті.